每逢來到星期一，工作都特別繁忙，加上近排天氣又濕又熱，實在讓人喘不過氣來，十分納悶，下班後決定找點美食來為 Blue Monday 打打氣。記得早前有食友特意揀咗界限街一間開業大約只有兩個月的天堂咖啡室《Café Paradise》去試吓店裡的晚餐，回來後撰文說餐廳的食物，有一定水準，不但份量十足，而且用料亦絕不馬夫，值得一試。見友人講到咁吸引，就一於拉埋老公兩口子去試吓。

其實餐廳是位於界限街與汝州街交界，講真，對我這個港島人來說，的確是有點不便，不過原來由太子港鐵站 D 出口行過嚟，亦只是數分鐘路程，地點又唔講得上好隔涉。













到達後見餐廳門面原來比想像中更搶眼，尤其是外牆，用上純白色為主調，配上門外那張二人餐桌上放置的繽紛旋轉木馬擺設，裝潢亮麗別緻。拉門內進，原來店面頗細小狹窄，估計大約只可以容納 20 多人；不過就個人而言，其實幾鍾意餐廳的整體布置，尤其是牆身木架上的裝飾擺設，每一件都有其獨特個性，睇得出店主確實花咗唔少心思去搜羅，加上用餐環境簡單得來又唔花巧，令人坐得舒服。





安頓後先讓老公細閱餐牌，自己嘛，哈哈，當然樂得消遙自在，一於懶精上身，點餐任務就全交由他發辦好了。其實這裡所供應的 Set Dinner，價錢都算合理，售價由 $118-$158 不等，另外還有多款散點的意粉、意大利飯、天使麵及 All Day Breakfast。老公於晚餐餐牌六款主菜當中，點來了扒澳洲肉眼配燒汁及黑松露野菌意大利飯。每客晚餐仲會包是日餐湯、田園沙律、甜品、咖啡或茶，不過如果想轉配特飲，就要另加 $15，而轉花茶每壺則另加 $25。

首先出場的餐湯是粟米忌廉湯，先用湯匙舀起看看，粟米粒的分量雖然唔多，而且質感亦略嫌有點稀薄，不過忌廉的味道好濃郁，而且喝下亦帶淡淡粟米香，個人覺得如果可以用來配一客餐包或蒜蓉包，應該會更加吸引。

緊接的田園沙律，賣相看起來有點單調，碟上除了少許沙律菜外就只有兩顆已切半的車厘茄，幸好菜蔬入口夠爽甜脆身，以意大利油醋汁伴吃，水準亦不俗。



主菜方面，先品嚐黑松露野菌意大利飯 ($118)，時令雜菌用上牛油炒香，再加入意大利米及上湯同煮，最後放進意大利黑松露醬以增添香氣。舀起一匙試試，原來每粒米飯都輕滲著陣陣菇香，而且質感煙韌得來又有咬口，吃罷口腔更充滿松露的幽香，如果可以做得再濕潤一點，相信會更加滋味。





至於另一客扒澳洲肉眼配燒汁 ($158)，肉眼扒煎至五成熟，沒添加任何鬆肉粉，只用黑椒及鹽調味，端上桌時分量十足。先切開試試，肉味比想像中濃郁，而且吃時更滿是肉汁，味道誘人，不過就稍嫌肉質有少許韌，幸好伴吃的薯角，入口外脆內粉，配爽口的西蘭花和翠肉瓜，加埋香濃的燒汁，令食味提升不少。

飲品方面，和老公不約而同地點了近排大家都愛上的沙冰，分別有熱情果沙冰 (+$15) 及野莓沙冰，前者色澤帶點檸檬黃，入口鮮果味濃郁、甜而不膩，喝起來非常醒胃，而後者野莓沙冰 (+$15)，味道天然，一啖入口清涼透心，加上陣陣清新的莓香，令人暑氣全消。





至於壓軸的甜品，經店員推介後，分別點了朱古力心太軟 (+$25) 及士多啤梨爆炸雪糕。前者心太軟，個蛋糕無論在密度、濕潤度和厚度，各方面都表現得好平均，水準唔錯，入口朱古力味夠 rich、濃得來又不太甜膩，以香滑的雲尼拿雪糕伴吃，味道的確不俗，只是稍嫌朱古力的流心效果不夠明顯。



至於另一客士多啤梨爆炸雪糕 (+$25)，初頭聽店員推介時，確實是有點迷惘，這客雪糕究竟是加入了甚麼食材做成爆炸效果呢？啊！謎團終於揭開，原來這甜品的做法是要先將雪糕球表面粘上脆漿，炸成圓餅狀，再於面頭撒上一點爆炸糖，明白，難怪放進口時，既感到香脆冰凍又會「霹靂啪啦」作響，果然玩味十足，為味蕾帶來嶄新感受。整體來說，店裡食物水準唔錯，而且幾位女店員的工作態度亦算勤快有禮，服務不賴，始終店子開業只有兩個多月，還需要時間磨合。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================