自助餐以外的選擇

友人相約晚飯，地點選了港島太平洋酒店的「薈萃閣」，吓，又食自助餐？ 真不愧為自助餐達人。噢，原來誤會咗添，其實好友是屬意來一試餐廳 a la carte menu 內的 Signature Dishes。這提議頗不錯喎，反正只得我們幾個，人少少，就揀幾客精選菜式一同分享，坐下來慢慢傾，慢慢食，又不會吃得太  heavy，啱曬我。



其實來港島太平洋酒店，交通挺方便，由港鐵上環站步行過來，只需約 10 分鐘路程；若是怕行的話，亦大可於西港城搭電車前來，只是幾個車站便到。落車後向海皮方向行入正街，再沿著這條扶手電梯上，會先看見大堂樓層的「優悅吧」，而筆者當晚就留意到有歌手在場內獻唱，氣氛看起來頗輕鬆。至於「薈萃閣」則設於 The BAR 的上一層，餐廳裝潢唔錯，地方十分闊落，加上環境夠開揚，感覺都幾舒適。





翻開餐牌，精選菜式只有 8 款選擇，唔算多，有凱撒沙律、特級三文治、牛油果意大利包、藍青口、炸魚薯條、三文魚柳、燒春雞及羊扒，由 $108 – $198，價錢唔貴，另外餐廳還有好幾款亞洲特色美食供應，如海南雞飯、咖喱牛腩、咕嚕肉等。發現 Signature Dishes 當中有幾款均屬廚師推介，而且賣相看起來十分吸引，決定一試。



首先出場的是這客附上薄荷醬和芥末醬的燒紐西蘭羊扒 ($198)，羊扒一客三件，分量適中。切了一小塊入口，羊肉燒得剛好，入口幼滑，香味濃郁，而且吃起來既鮮嫩又充滿肉汁，配合旁邊微酸的黑醋汁及清甜的南瓜蓉同吃，除了可提升肉味之外，更有減輕羊羶味之效，值得推介！





也點了一客慢煮三文魚柳配菠菜及扁意粉 ($188)，其實慢煮在歐美流行已久，不過在香港則是近年才興起。所謂慢煮就是以精準的溫度和時間，將食物放入暖水煮至半熟或全熟，以保留食材的味道與水份，令食物保持原汁原味。至於這客呈鮮橙色、以勁大粒魚籽作點綴的三文魚柳，望落去充滿光澤，魚肉非常嫩滑，入口外層微熟，而且吃得滿嘴油脂，配以菠菜蓉做成的忌廉汁及煙韌帶嚼口的扁意粉，滑溜又好吃，味道果然出色。





由於有男士在場，怕大家唔夠飽，所以加點了一客牛油果意大利包 ($108)。成品初端上檯時，的確被它的 size 嚇了一跳，嘩，分量咁大嘅！細看餡料，除咗有軟綿柔滑的牛油果外，包裡還夾入了烤至香脆可口的煙肉、煎蛋、雞肉、番茄和生菜等，用料十足，配上外層硬身得來又夠煙韌的 ciabatta 包，既美味又飽肚。



見隣桌吃自助餐的食客取了杯雪糕回座位，引得我也心思思想吃甜點，究竟揀《香芒情迷》好，定還是選《海鹽之心》好呢？ 最後由好友拍板，點了這客色彩繽紛、賣相非常誘人的《快樂無限》Happy Forever ($98)。先嚐一啖甜美的藍莓雪糕、入口香濃幼滑，而且由於中間夾雜了不少粒粒藍莓，吃起來充滿咬感，好 refresh；配莓香滿載的芒果紅桑子雪糕、帶熱情果醬芬芳的芒果熱情果雪糕，同埋酸中帶甜的粒粒紅桑子及芒果，香甜味美，好滿足呀！

雖然知道來吃自助餐會比單點較抵食，但試過幾款散叫菜式，水準的確唔錯，加上餐廳環境十分幽靜，人少少又唔想食得太 full 的話，這裡也是個不錯的選擇。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================