試食活動

每逢氣溫稍為下跌幾度，家中的一老一少便已急不及待嚷著要去打邊爐！近年火鍋店愈開愈多，款式也百花齊放，大街小巷的食肆更紛紛興起雞煲熱潮，先食雞，再加湯打邊爐，既飽肚又驅寒。早兩天收到食友饞餵人及店方邀請，來到旺角創興廣場的「至尊重慶雞煲」，一齊享受圍爐烚吓烚吓的樂趣，實在非常開心，在此先要說聲多謝。

千祈唔好以為咁少客，好多吉檯，只不過是筆者當日早到，其實在我和食友入座後不久，旁邊的座位已經即時被一大群食力非凡的年輕人坐滿，而且瞥見店門外還大排長龍，非常誇張啊！

安頓後先細看價目，原來是以入座計兩小時，任飲任食全包價收費，星期一至四，17:00pm-23:00pm，成人每位 $138，而星期五、六、日、公眾假期及假日前夕則每位加收 $10，另還設有貓頭鷹時段，由 23:00pm-03:00am，成人每位只收親民價 $108，非常適合夜貓族來吃宵夜。

據負責人講，原來店裡的雞煲，唔單止有惹味的麻辣香，甚至連吃法亦都大有學問，要跟足其食雞 3 步曲：先食雞；再放入花膠、魷魚、牛栢葉吸盡醬汁精華；最後加湯灼肉、餃子、丸子和菜等，慢慢嘆，吃完先至有回味感覺。

至於飲品方面，除了這個擺滿了各式汽水的凍櫃外，竟然還有薏米水。據說麻辣火鍋吃得多，難免會加重脾虛、濕熱症狀，而薏米具有健脾、補肺、清熱、利濕等功效，對身體大有裨益。

咁就先試雞煲，原來雞隻分量是以人頭計算，2-3 位半隻，3-5 位一隻，6-7 位隻半，如此類推，而當日店家就安排咗一個至尊重慶蜑家雞煲 (蜑家雞煲須預訂，並每煲另加收 $298) 給我們享用。由於筆者和幾位食友都並不嗜辣，所以只點了小辣淺嘗刺激。

至於這個曾於「食神爭霸戰」中獲獎的蜑家雞煲與重慶雞煲有甚麼不同，原來除了精選靚雞外，煲裡還加入咗唔少海上珍寶，包括肉蟹、蝦隻和花蛤等，材料非常豐富。素知香料對煮雞煲來說尤其重要，而據說店裡烹調雞煲的材料，包括川椒、八角等均由專人直接到四川家鄉採購回來，的確誠意十足。先試雞件，入口香中常辣，辣中帶麻，辣味慢慢滲出，感覺非常複雜，果真唔簡單，配埋手掌咁大嘅蝦隻和蟹蓋，令人回味無窮。

原來除了蜑家雞煲，店家還為我們準備了另一個以黃酒、酒釀、北芪及當歸烹製的千奇米酒雞煲，好適合女仕享用，品嘗起來既有米酒的甘醇，淡淡的藥材香，濃郁中卻又不會有酒嗆味和藥膳的苦味，食味不俗。

由於 4 個人已吃了隻半雞，食力有限，所以火鍋配料吃得不多，只簡單的點了些美國肥牛、鯪魚滑、鮮鵝腸、炸魚皮、午餐肉、枝竹等。不過也有些必食推介，如養顏滋補的花膠，多滾淥也不會溶爛，吃時爽口入味；而切得細緻均勻的淮陽凍豆腐，吃起來美味嫩滑，亦值得一試。

必食的，當然還有店家特別推介嘅香甜多汁粟米、煮起來粉糯軟綿的芋頭片、質感煙韌的韓國公仔麵、既吸味又爽彈的紅薯粉、柔韌滑溜的日本烏冬，味道各具層次。



差點忘了，還有幾款新鮮包製的招牌餃子，包括洋蔥牛肉餃和京蔥羊肉餃，而筆者就特別推介店裡的西洋菜豬肉餃，皮的厚度和餡料比例都拿捏得十分準繩，既飽肚又可吃到鮮味肉餡和爽口蔬菜，簡單又好吃。最後再吃返杯冰凍雪糕，簡直是人生一大樂事。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================