試食活動

唔知大家有無聽過 SodaCard 呢？其實筆者早於去年已經介紹過 SodaCard 的運作，不過亦請容我在此不厭其煩，再簡略講解一吓。SodaCard 其實是一個通行全港的積分獎賞計劃，客人只需註冊成為  Soda 會員，便可以於百逾家特選餐廳、酒吧、零售商戶賺取積分、換取獨特獎賞及額外禮遇。筆者早前就應 Soda 市場推廣及其中一間參與商戶「沙嗲王」的邀請，到其銅鑼灣分店體驗一吓使用  SodaCard 及品嚐店中幾款新近推出的食品，在此先要說聲多謝。

相信大家對「沙嗲王」這個品牌一定唔會感到陌生，尤其是店裡的招牌作《白咖喱豬扒飯》，更是筆者每次光顧必點之物。安頓後先點飲品，雖然筆者向來對凍飲都情有獨鍾，可惜這幾天一直有點咳，還是以身體為重，乖乖的揀了杯熱薑汁蜜 ($27)，幸好喝起來雖然只有淡淡的薑味，不算濃郁，但甜度剛好，飲完順喉又舒暢！

接著出場是幾款 Appetizers，先試魚籽薯仔沙律 ($29)，魚籽分量唔多，每人只分得一丁點，幸而另一主角薯仔粒吃起來口感鬆軟，而旁邊的蔬菜亦夠鮮甜爽脆，再伴以沙律醬及溏心蛋，味道一點也不賴，夠曬健康醒胃。

至於自家製越式蝦餅 ($58)，雖然食味都算唔錯，咬落爽彈得來更帶著淡淡蝦肉的芳香，不過就略嫌口感過於油膩，好彩有惹味的酸辣醬蘸點拌吃，不過筆者反而建議應改以鮮美的越南魚露汁同上，相信吃起來更加有風味。

沒來「沙嗲王」一段日子，發現餐牌竟然多了數款 6” 《王之酥皮Pizza》，當中包括咖喱香茅豬扒粒、蝦仁鮮茄醬、水手披薩及煙肉菠蘿鮮茄醬等，售價由 $30-$35 不等，不過這天我們試吃的卻是尚未推出、入口香辣惹味的娘惹牛肉 Pizza，配上超鬆脆的薄餅底，好味得真想再 encore 多一客。

一客兩件的北海道芝心餅 (一件 $22；兩件或以上每件 $20)，其中一件鋪上韓國酸辣椒，不過入口唔酸唔辣，似爽口的榨菜多一點；而另一件則鋪上香口的紫菜芝麻，配上有流心效果的芝心餅，鹹香濃郁，愛吃芝士的朋友，值得一試。

緊接出場的四款 Main Dish，包括有米線、拉麵、焗豬扒飯和肥牛炒飯。先品嚐冬蔭功札肉鮮蝦米線配日本溏心蛋 ($52)，米線本身淡而無味，所以食材、湯底的配搭尤其重要。呷一口以香茅、檸檬葉、九層塔和芫荽等熬製的湯底，濃稠厚身，配上味道鮮甜的蝦隻、爽韌的札肉和半隻蛋味香濃的溏心蛋，簡單的一碗米線已經十分滿足。

至於另一客沙嗲安格斯肥牛拉麵配日本溏心蛋 ($59)，以濃郁惹味的沙嗲湯底配薄切安格斯肥牛，加上麵條入口爽身煙韌，與辣味突出的沙嗲湯底非常配合。

接著出場的兩客飯，先上的鮮茄芝士焗厚切豬扒飯 ($63)，分量比「大家樂」的一哥焗豬扒飯更加大堆頭大製作，原件厚切豬扒，以薄蛋漿煎封，吃起來肉質頗鬆軟，食味都算唔錯，不過就嫌個炒飯底做得頗不濟，配料太少、蛋花不足，入口濕漉漉的；反而另一客泡菜安格斯肥牛炒飯，飯炒得粒粒分明又乾身，而泡菜亦酸香脆口，辣味圓潤，配上香口的蔥粒和肥牛，吃起來香辣又惹味，很有飽足感。

甜品環節，分別有 Platinum 芝士蛋糕 ($30) 和雪糕蘋果批 ($25)，前者芝士蛋糕入口順滑而不膩、加上下層的牛油曲奇餅底，讓芝士蛋糕的餘香在口腔內延續下去；至於後者蘋果批，吃起來夠曬鬆脆，甜而不膩，而香滑的雪糕更有中和蘋果酸味之效，兩者簡直是 perfect match。

如果大家想知道更多 Soda 熱點又或者 Soda 與「沙嗲王」的積分獎賞優惠，就不妨到相關網站瀏覽一吓。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================