早前參加抽獎,中咗啲凱旋餅店換領券,襯今日假期,就去買啲麵包蛋糕做午餐。
焦糖咖啡朱古力慕絲 ($72) --- 企喺門口嘅玻璃櫃已經一眼睇中咗呢款蛋糕,皆因佢外形精美,蛋糕頂除咗有幾粒水果外,那卷筒形嘅朱古力最吸引,加上亞仔鍾意焦糖咖啡,想必符合大家口味。但原來食落去又係另一回事,個蛋糕因為以 mousse 為主,最底層個蛋糕 base 好薄,老公唔係咁喜歡,至於層慕絲雖然都幾軟滑,但焦糖咖啡味唔夠濃郁,可幸蛋糕頂嘅水果鮮甜,層啫喱滑 "劣劣",滾筒朱古力味道都幾濃,整體而言都算過得去
紅莓提子鬆餅 ($4.5) --- 好好味,雖然個鬆餅細細個,但有好多紅莓提子,牛油味幾濃,鬆餅餅身做得好鬆脆,餅面甜甜地又唔乾,好有水準
吞拿魚酥 ($6.5) --- 吞拿魚唔算多,但個酥皮做得幾出色,雖然無數過有幾多層,不過食落口幾酥脆,不太油膩,
照燒雞扒包 ($11) --- 雞扒用照燒汁煎過,煎到金金黃黃,味道調校得啱啱好,包身軟熟,如果整番熱先食,相信會更加美味
咖喱牛肉包 ($6.5) --- 個包嘅面頭有大量芝蔴,切開裏面牛肉放得不算多,而且無落醬汁,感覺比較乾,但聞落去咖喱味好香,如果加番啲咖喱汁就會正啲喇
全部麵包蛋糕買咗 $100.50, 補番 $0.50就走得。
============================================
感謝 mjqueen7e 提供以上資料
mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
============================================