今日公眾假期,唔駛返工,亞仔又未起身,決定同老公去試吓吉野家最近推出嘅朝朝至營炒蛋系列早餐。印象中我係從未試過喺吉野家食早餐,去到大約十點半左右,離遠已經見到一條長長嘅人龍,嘩!原來吉野家都唔少人嚟食早餐。
海苔炒蛋+和風牛肉+雞肉腸+迷你珍珠白飯 ($19.50) 及 海苔炒蛋+野菜煎雞+雞肉腸 ($17.50)
用咗報紙優惠券,每份餐減 $2, 宣傳廣告話炒蛋係選用新鮮農場雞蛋,加入淡奶反覆攪拌至香滑蛋汁,以慢火快炒的方法,配合金黃粟米及咸香火腿炒製而成,蛋嫰香軟。不過食落去又唔覺有幾滑喎,普普通通喇,唔及得我上次喺華星冰室食嘅炒蛋咁嫩滑。
至於牛肉同煎雞當然無得彈,同以住食開嘅一樣水準,牛肉好入味,肥瘦適中,更配有爽甜嘅洋蔥;煎雞件香脆肉嫩,加上雜菜及香濃配汁,感覺比較健康,老公話加埋碗珍珠白飯,一口飯一口餸,簡直一流。唯一係個餐配兩條雞肉腸就有點吃不消,晨早流流每人食兩條腸好像太多了,如果可將其中一條腸改配一件豆腐或一些珍菌之類嘅食品就更符合健康要求。當然食完早餐飲埋杯綠茶,有助消化同消脂,很不錯啊!
臨走帶一份外賣早餐返去俾屋企個懶精先。
============================================
感謝 mjqueen7e 提供以上資料
mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong
============================================