昨天陪亞仔逛銅鑼灣，掃街兼 shopping, 行咗成 4 粒幾鐘，行到雙腳攰曬。唉！人地話做人新抱甚艱難，做人父母又何嘗容易呢？親子係要付出代價嘅。由於對腳咁攰，今日唔去咁遠食下午茶喇，就近近地去東匯算啦。

呢度早茶 (7:30-12:30) 及下午茶 (13:45入座計) 星期一至五，小點$8.5, 中點$10.5,大點$12, 特點$14, 茗茶每位$4。另外仲有一些優惠點心，樂消遙下午茶及西點閒情等，適合愛吃中西合壁嘅茶客。 點心方面，我地就點選咗：-

鮮蝦炸雲吞 ($8.5) --- 個雲吞炸得非常鬆脆，每隻都有粒蝦，老公話大件夾抵食喎
蓮茸煎堆仔 ($6) --- 同樣很香口，芝蔴夠多，煙煙韌韌，好味
五香炸咸糭($8) --- 唔好睇佢樣衰衰，但係都幾好食，唔知係咪落咗五香粉同淮鹽，咸咸香香又脆脆地咁，都唔錯
脆皮腩仔瀨粉 ($13.8) --- 腩仔唔係好多件，細細舊，不過個皮燒得好脆，加埋個瀨粉濕濕地，食完夠晒飽肚
梅菜豬肉包 ($6) --- 呢個包就比較普通，但由於唔係好多食肆用梅菜做包餡，都算有新鮮感，一試無妨
香茜魚翅餃 ($8) --- 一向都係老公嘅至愛，我對呢個就一般喇

呢度除咗中式點心，仲有啲西式小点及西式甜品，例如蝦多士、洋葱圈、木糠布甸、慕絲蛋糕等，我都見有啲OL叫木糠布甸食，水準如何，就不得而知。其實我地以前有一段時間，常來東匯幫襯，後嚟覺得佢水準下降，所以無嚟一排，今次重臨，竟然有少少驚喜，發現我至愛吃的炸點，全部都唔錯，埋單$64，抵食。收銀姐姐仲有同我地講多謝添。埋單時又見到 Joe Junior 同一班女士吃下午茶，以前我差不多每次嚟親都會碰見Joe Junior, 無嚟咁耐，再嚟番竟然又撞啱佢喺度，睇嚟呢度肯定係佢嘅飯堂。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================