8 重溫昔日美味情懷

約了友人去西環探個好姊妹，見時間尚早，想找個地方 hea 吓。醒起之前食友曾提過《金記冰室》在灣仔開了分店，講起上嚟又真係有啲大鄉里，其實自從兩年前《金記冰室》由筲箕灣搬到西營盤重開後，筆者仍未曾到訪過，反正人在附近，就一於趁空檔過去八吓，或者還來得及吃個下午茶餐呢！











原來這冰室佔著兩個相連舖位，地方比想像中大，環視四周，見佈置相當得體企理，加上店內的一檯一物，以至牆身上的算盤、舊海報、圓銻碟及地上綠白色的磚塊等，全都充滿著懷舊氣息，讓人有置身舊香港的感覺。





先翻開那個超級鬼馬、以乒乓波板改裝而成的餐牌，食物款式勁多，招牌鮮豬潤通粉、鮮牛肉福字麵、特色農夫包、馬來咖喱、Q 版西多、香港情懷鐵板餐、懷舊學生餐等等，真係多到數都數唔曬。

本來想點客西多士餐，不過見香炸豉油皇雞脾配沙律 ($48) 好似更加吸引，立即轉呔。見隻炸雞脾端上桌時，顏色特深，多口一問，原來據說隻雞脾是先浸過瑞士汁才炸，難怪吃起來皮脆肉嫩，咬落 juicy，香口之餘更零舍入味，再配埋旁邊甜味重得來更沒有青澀味的薯仔沙律，一個人吃，分量剛好。



至於跟餐的羅宋湯，入口雖然唔算好濃稠，但番茄、甘筍跟牛肉湯底形成不可分割的天然甜味，水準亦不俗。



飲品本來想點已經很久沒喝過的黑牛，可惜原來西環店沒汽水供應，幸好還有我至愛的紅豆冰 (跟餐 +$10)，內裡的紅豆，既大粒又香甜，而且腍得來更保持著點點咬口，與花奶混和後，夠曬冰涼解渴，其實幸福就是這麼簡單。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================