牛肋骨極之出色

每次同住在港島區的朋友提起想食韓國菜，佢都會推介我去尖沙嘴的金巴利街，不過其實要品嘗韓國真味，又唔一定要來這條韓國街。早前在臉書上看見友人力讚位於銅鑼灣邊寧頓街的一間韓國料理店《首爾家》，據說店裡的食物水準唔錯，尤其是一道招牌牛肋骨，炆得軟腍入味，令人愛不釋口，所以亦膽粗粗拉了老公來試吓，吃罷覺得牛肋骨確實是超水準之作，讓人吃得十分滿意，值得推薦。







座落於銅鑼灣隆堡柏寧頓酒店一樓的《首爾家》，地方雖然唔算好大，不過睇嚟餐廳在佈置上都花咗唔少心機。店子用上啡木色為主調，座位以小屏風作間隔，用意加強私人空間，配搭天花的紙糊白色吊燈同牆身上的掛畫，裝潢骨子雅緻。

甫入座，店員已經快手快腳放下了 6 小碟前菜，當中包括有韓式泡菜、大豆芽、海帶、腰果魚乾、甜薯仔同魚片。除了因為怕辣，所以對泡菜興趣不大之外，其實餘下幾款味道都唔錯，尤其是大豆芽，入口爽脆得來又無草青味；而薯仔粒亦夠粉身甜美；另外魚片薄薄的一塊，質地雖然較腍，但入口充滿魚香味，口感過癮。



由於這晚沒打算吃烤肉，而且一心為炆牛肋骨而來，所以翻開餐牌後，就先跳過套餐，直接揭去散點嗰幾頁。吃牛肋骨前，決定先點一客暖胃的牛尾湯 ($108) 試試。其實在韓國，湯算是主菜，通常一家人吃飯，會煮一鍋湯，大家手上拿碗白飯，就這麼吃起來，頂多再配一些醃漬小菜。先喝一口以牛骨熬成的乳白色湯頭，入口味濃鮮香，加上肉質細嫩的牛尾，再扒幾口白飯，真令人回味無窮。



至於這客被網友勁讚的炆牛肋骨 ($128)，賣相果然對辦，而且端上來時還冒著煙。先試一小匙湯汁，入口不但充滿濃郁的肉味，而且更帶陣陣蘿蔔的甜香，味道調校得恰到好處。再挾起一塊牛肋骨試試，肉質鬆厚得來又夠嫩滑，而且炆得非常入味，只要用口輕輕一咬，便輕易將肉與骨分開，可見火喉十足。同炆的蘿蔔當然也是極品，由於吸收了牛肋骨的肉汁，吃起來清甜入味，加上軟滑厚身的的冬菇、煙韌的韓式年糕和蛋絲等，用來送飯一流。

至於這客韓式炒粉絲 ($88)，材料除咗粉絲外，就只有少量椰菜同牛肉，面頭再撒上蛋絲和芝麻，用料唔算豐富。挾起品嚐，粉絲入口帶甜豉油和麻油的香氣，味道本來唔錯，只可惜碟粉絲實在炒得太乾身，連少少醬汁都無，而且挾起來痴埋一舊舊，實屬水準以下之作，幸好吃起來唔算油膩。



另外也點了一客紫菜牛肉包飯 ($68)，成品端上桌後，先細看裡面的材料，除了牛肉外，還包括有黃瓜、紅蘿蔔、青瓜和蛋卷。牛肉份量其實唔算少，而且入口充滿甜甜的韓式醬汁味道，加上微酸的黃瓜漬和厚身的蛋卷，能帶出清新的味道，再配合外層鬆脆的紫菜和伴吃的沙律，兩個人 Share 夠曬飽肚。

甜品點了店員推介的韓式雪糕甜餅 ($42)，原來據說這款圓形的甜煎餅，是韓國地道街頭小食，入口味道香甜兼帶點煙韌，而筆者就尤其喜愛煎餅的邊位，咬下香脆可口，配上餅面的南瓜籽、松子和葵花籽，再加上兩球冰涼的草莓雪糕及雲呢拿雪糕，食味豐富。

飲品點了青檸檬汽水 ($28) 同梅子汽水 ($28) 各一杯，前者色澤搶眼、味道酸香得來又夠清新，而後者則帶梅子的幽香，入口酸酸甜甜，好開胃。

對這晚整體菜式，其實有彈有讚，不過牛尾湯同炆牛肋骨，味道的確出色，讓人驚喜，絕對值得一試。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================