仙台暗遇法蘭西

近這兩個月以來同炸豬排結下不解之緣，由中環小草莓食到銅鑼灣仙人掌，再由豚組食到豚兵衛，仍未覺厭倦。近日知道在尖沙咀人煙較少嘅角落新開一間居酒屋，而入面亦有賣水準唔錯嘅炸豬排，趁小店仍在試業階段，人氣未盛，決定早一點到來試菜...

多幸八位置算偏僻，認住個八字燈籠吧！



多幸八 Takohachi 位於天文台圍最深處，即係天文台道山景酒店對面果條小街，位置都真係幾偏僻，當然有去開秋田鐵板燒同 8 Fine Irishmen Pub 嘅朋友應該唔會陌生，而小店門口掛著一個八字燈籠，非常容易搵到。

魚缸空空未有刺身供應


小店內部裝修簡潔舒適，除一般坐位外，亦有一排面對半開放式廚房座位，感覺有如壽司店一樣。而多幸八有一樣野我最喜愛就係燈光非常充足，對於好似我呢類先餵飽相機先嘅人黎講，絕對係一件好事。

以仙台料理跟法蘭西的結合


今次用餐較特別，因為小弟時間唔充裕，所以訂位時已順道落單，難得負責人有耐性在電話中為本人打點，服務質素絕對值得加分。經負責人介紹下，今次先試炸豬排同炸忌廉蟹餅，本來對燒雞串同牛舌都有興趣，但胃納有限實在無福消受。另外，餐牌上有好多洋食同埋洋式Fusion懷石料理，絕對係下次到訪先修科。

吉列豬扒用上鹿兒島豚肉


先送上吉列豬扒($150)份量唔少，晚市原本不設定食，加$10有白飯，漬物及湯汁。用上鹿兒島豚肉，咬落鮮嫩鬆化，肉汁豐盈，而豬扒汁自家特別調制，味道略嫌過於濃厚，可以輕一點更好。

自家豬扒汁較重口味


至於最關心嘅炸功問題，係意料之中嘅失望，炸麵衣屬薄身做得唔錯，但離罩鬆散程度有點慘不忍賭，相同情況之前在Ichigo，勝博殿，豚組等都有出現，相反老大哥丼吉及銀座梅林做得唔錯。炸功，始終最直接影響賣相同味道，所以丼吉可以在港迄立多年仍有領導地位，箇中原因非常明顯。

食炸豬扒時不可或缺的白飯

配套尚算可以，但唔算突出


 白飯用上越光米，飯粒飽滿，夠米香亦夠乾身。麵豉湯屬一般貨色，但湯內豆腐粒份量非常慷慨，滿足度提升不少，牛蒡煎蛋卷小食不過不失，整體配套都令人滿意。

Korokke上醬汁甚具法國風味



口感幼滑，略嫌蟹肉較少


隨後送上炸忌廉蟹餅(半份$60/全份$100)，Korokke配上薯仔沙律及椰菜絲，再淋上自家特制醬汁，賣相幾吸引。醬汁由蕃茄醬，牛油及甘筍等材料混合而成，酸酸的非常醒胃。蟹餅切開後，忌廉香味撲鼻，熱氣騰騰，口感濃郁帶點幼滑，略嫌蟹肉較少，但整體味道相當唔錯。對呢份Korokke有一點小意見，如果將醬汁分開上，可以讓蟹餅脆度更持久一點就更完美了。

蘋果果凍甜品有點誠意


跟負責人飯後交流意見時得知，日籍主理人加藤武郎先生出生於仙台，曾到法國留學，之後於東京Hilton擔任主廚，所以在其仙台料理中亦加入法國菜精髓，而最後送上嘅蘋果果凍甜品嘅精彩度中可見一斑。
仙台，相信大家短期內都唔會去，愛到日本嘅你，掛念嗎？如果，對仙台料理牽腸掛肚的話，多幸八係一個好選擇。

 多幸八 Takohachi
尖沙咀天文台圍5-9號諾士佛廣場地下B舖

============================================

感謝 kent1012 提供以上資料

kent1012http://www.kentxfood.com/

============================================