炸豬排新勢力來襲

勝博殿係日本最具規模嘅豬排連鎖店之一，早在亞洲其他地區亦有多間分店，其中在台灣亦有13間分店。得知銅鑼灣亨利中心地庫總店今日正式開業，特意第一時間來朝聖，其實香港機場離境禁區一早亦有勝博殿外賣小店，負責人表示其集團跟機場果間係完全獨立無關係，銅鑼灣店先至係香港正式第一間...

さぼてん在亞洲已有過百間分店

裝修設計跟台灣日本一樣，簡單又舒適


勝博殿日文名字さぼてん意思為仙人掌，取其名字原因係希望勝博殿可以好似仙人掌一樣有頑強生命力，甚具霸氣。內部裝修設計方面跟台灣格局一樣，亦有少許銀座梅林影子。剛開業第一個小時到來，已見到不少日本人到來光顧，似乎勝博殿在日本遠方口碑亦唔錯，早已吸引到唔少居港日人到來。
餐牌選擇組合相當多，有日本宮崎特級豬扒，有台灣熟成麥豬，有炸蝦，有咖哩亦有各式沙律，款式選擇非常多，侍應有禮地介紹各款食物特色後，亦主動推介我嘗試只有勝博殿先有嘅元祖鮮嫩豬柳卷套餐 - 月($148)，套餐有豬柳卷，忌廉蟹肉餅，炸豬排，再配上白飯，湯汁，椰菜及漬物，似乎非常豐富，決定跟隨侍應推介點餐。

秘制豬排汁味道唔錯


待餐前慣例由侍應解說磨芝麻程序及介紹自家秘制豬排汁，呢個秘制豬排汁以洋蔥，蕃茄，蘋果及紅蘿蔔為基本原料，再添加多種香料製作。據稱係由北海道富良野果邊研發出黎，入口微甜，濃稠度剛好，混上芝麻後香味十足，餐未到已忍唔住試左幾啖，因為事實真係幾好味...

椰菜絲清新爽口，兩款醬料同樣滿意


隨後送上一大盤椰菜絲，新鮮甘甜，食落爽口亦無澀味。呢度有柚子醋及麻醬沙律汁提供，兩者混上椰菜絲同樣好味，我較喜歡柚子醋，酸酸甜甜的，天熱食特別醒胃。

青瓜漬物入口爽甜



全部都可以無限量添食，抵！


除椰菜絲外，亦提供蘿蔔及青瓜兩款漬物，青瓜入口爽甜，蘿蔔漬脆口唔太酸，兩者加上椰菜絲，確實可以多送一碗白飯，而且全部無限任添加，當然食得暢快！

元祖鮮嫩豬柳卷套餐, 價錢合理


等了不足五分鐘，豬排定食主菜部份送上，勝博殿嘅豬柳卷有芝士，露筍同紫蘇烏梅三種選擇，我較保守地選芝士作餡，而熱騰騰嘅芝士好似熔岩慢慢湧出，賣相幾吸引，所以餵飽相機後便急急起動...

勝博殿名物豬柳卷色香味俱全


豬柳卷最特別係豬柳同芝士內層中間加入一塊煙肉，倍添一份煙燻鹹香味。芝士香濃唔膩口，咬落去輕易拉出一絲絲芝士效果，賞心悅目，而且外層麵衣香脆鬆化，吸油功夫亦做得出色，口感細緻軟滑，絕無粗糙感覺，不愧為店方推介名物。

忌廉蟹肉餅幼滑之餘亦夠香濃


忌廉蟹肉餅外層做得同樣香脆，忌廉幼滑之餘亦夠香濃，蟹肉餡料亦夠慷慨，非常好食。相比較早前在中環Ichigo食過同樣出色忌廉蟹肉餅，勝博殿的多一份奶香，但肉餡方面就Ichigo略勝一籌，可以話係各有千秋，實在幾難分出勝負。

炸豬排離罩問題相當嚴重


反而炸豬排部份就略為失望，用上跟台灣一樣的熟成麥豬，柔軟富肉味，可惜「離罩」問題比起Ichigo更嚴重，一夾直頭散開晒，炸粉散落四周，令人可惜。其實既然炸麵衣做得唔錯，肉香嚼感亦令人滿意，如果要衰在炸功手上就唔係太值得。

白飯真的太濕，影響口感



麥飯比白飯好味得多，無限添飯，正呀！


白飯方面用上日本種，但在黑龍江種植，侍應答得夠專業亦夠坦白，值得一讚。不過白飯食落太濕，米香及黏性都未達我個人要求，如果可以選好一點米種會更理想。另外，呢度亦可選較健康嘅麥飯，添飯時我叫半碗一試，飯粒分明有咬口，跟白飯即時高低立見，大家到來不妨考慮要麥飯。
餐後負責人Avis前來問一下意見，除白飯太濕同炸豬排離罩問題外，我整體非常滿意今次用餐體驗。另外亦表達個人意見，既然椰菜白飯漬物，甚至麵豉湯都可以無限添加的話，如果唔加散點比大家選擇，送飯時的確會有空虛感覺。Avis解釋開店初期會沿用台灣日本正店餐牌組合，稍後會聽從本港客人意見而再作出修改。店子今日第一日開業，點餐上菜流程已算做得唔錯，期待日後再作微調，可跟豚組丼吉一齊逐鹿炸豬排市場。


勝博殿日式炸豬排
銅鑼灣恩平道42號亨利中心地庫

============================================

感謝 kent1012 提供以上資料

kent1012http://www.kentxfood.com/

============================================