上次到厚福街新食廈拜會天之月後，已被樓下一個巨型魔字招牌吸引，當時餐廳仍未開張，所以未知呢個魔字背後到底代表乜野。直至早幾日路過先知係一間日本拉麵店，不過發現時剛食左另一間新拉麵店鳥華，只好等下次到訪機會。剛巧識食之人奔天人兄早前已到來試食，聽他說整體評價甚佳，更令我到來前先打下強心針...
![]( "140511-01")
|
| 大家準備入魔了嗎? |
當升降機門打開，一個極具氣勢嘅魔字出現在眼前，旁邊亦寫住久留米粒麵。據知本店大廚曾遠赴久留美研習拉麵製法，同時亦邀請日本師傅親自調教出濃厚豬骨湯底。負責人之一靚仔老闆Ken解釋說，佢地嘅豬骨湯以150斤豬筒骨熬製10小時而成，所以湯頭比起其他店子更豐厚濃郁。
![]( "140511-02")
|
| 五款拉麵各具特色，好彩老闆為我發辦 |
魔麵有五款拉麵選擇，分別為豬骨湯底「豚魔」，醬油湯底「醬魔」，味噌湯底「味魔」，辣味湯底「辣魔」同埋鹽味湯底「鹽魔」，同樣定價為$68，價錢方面合理。Ken非常細心地解釋每款拉麵有咩獨特之處，而且更先了解我對拉麵要求及喜好，再作出推介，實在非常貼心。其實當時我倆五款拉麵都覺得吸引，一下子決定唔到，所以最終交由Ken替我地發辦，連拉麵也可以來個Omakase！
![]( "140511-03")
|
| 睇落差唔多，食落不一樣 |
拉麵送來後發覺外觀分別不大，但心諗Ken無理由俾兩碗一樣我地，Ken隨即解釋一碗係辣魔(上圖左)，一碗係豚魔(上圖右)，因為辣魔本身都係以豬骨濃湯做基本，所以顏色較接近，但入口係完全兩碼子嘅事...
![]( "140511-04")
|
| 豬骨濃湯極濃稠，飲落又唔太咸，掂！ |
先試豚魔，賣相組合實在似曾相識，义燒，溏心蛋，豚角煮加紫菜，完全跟達磨一樣，不過價錢方面呢度更划算。例牌先試一啖湯頭，豬骨味極濃稠，入口感覺膠質甚重，可見湯底含豐富骨膠原，果然真材實料...
![]( "140511-05")
|
| 义燒有水準，當然邊位烤得焦一點會更好 |
义燒厚度剛好，肥瘦亦恰到好處，咬落質感豐腴，水準唔錯。如果可以效法秀拉麵，將肉邊位烤得微焦，食落一定更甘香鬆化，已向Ken反映意見，希望佢地為產品作微調時可以考慮。
![]( "140511-06")
|
| 幼身麵線，軟硬度可自己選擇 |
麵條方面，似乎用上九洲拉麵中常見嘅幼身麵線，蛋香一般，咬落雖唔算好彈牙，但起碼唔會好快就變軟成糊狀。麵質方面其實係有得以個人喜好作選擇，不過Ken話由於豬骨湯底較濃，所以麵質選叫較硬會更適合，果然無介紹錯！同時亦可見店方在麵質軟硬度控制上唔錯，就算唔係用MIST果款嘅小麥麵線，同樣可以令客人食得滿足開心。
![]( "140511-07")
|
| 非常狡猾嘅湯底，被外觀蒙騙了... |
辣魔由於其他部份跟豚魔一樣，不作詳細介紹，只試湯底部份就足夠。辣魔擁有一個非常狡猾嘅湯底，表面望落去完全可以令你掉以輕心，好彩老闆預先作出溫馨提示，否則大大啖飲落去必定出事。湯底內其實加入辣度甚強嘅醬料，入口後辛辣感覺迅速刺激大腦，非常過癮。由於本人對辣味承受能力偏低，所以大家可能只係我食唔到辣先至大驚小怪，不過原來好戲在後頭...
![]( "140511-08")
|
| 加入辣醬，辣魔隨即升上HardCore Level！ |
Ken建議先將辣魔食一半後，再混入附上嘅一碟辣醬，辣度會再一次提升。加入辣醬後，辣度升級至Max Level！湯底中豬骨味出奇地更見突出，同時辣度已超出我極限，但又心思思犯賤想飲多一啖，果然係一碗魔性極強嘅拉麵。除非大家完全唔食得辣，否則我極推介呢款辣魔，一碗麵兩種感覺，實在有趣！
![]( "140511-09")
|
| 湯底完全KO！在味千是絕不會出現的事... |
最後我地兩人都將兩碗湯完全KO，Ken見狀覺得好驚訝好開心，佢話最高興見到客人可以將佢地豬骨湯飲晒，一滴都唔浪費，呢樣野在味千或者八八八係絕不會出現的事...（除非倒瀉）其實只要拉麵湯底做得有水準，我會一樣將佢飲晒，唔單止係要滿足自己味蕾，更重要嘅係對拉麵師傅嘅一種尊重同鼓勵！
![]( "140511-10")
|
| 雞軟骨不過不失 |
![]( "140511-11")
|
| 煎蛋卷食落鬆軟，蛋香亦夠 |
另外，店方為迎合香港人口味，餐牌上亦提供好多款前菜，炸物等小食作選擇。今次我試左至愛嘅炸雞軟骨($25)同煎蛋卷($22)，炸雞軟骨唔算有驚喜，食落有一點脆脆口感，新鮮熱辣算收貨。煎蛋卷煎得夠香，食落鬆軟得來蛋香亦夠，面層燒汁甜甜地，都幾好味，值得一試。
![]( "140511-02")
|
| 期待真正成魔之後的拉麵... |
魔麵開張不足一個星期，店方表示好多細節部份亦在微調中，向負責人講出食後意見，希望可以再上一層樓。Ken表示現時嘅餐牌及麵碗都唔係正式會使用的，之後在廚房將魔碗拎出來展示俾我睇，碗底米字圖案，加上赤紅色嘅魔字，可見呢班年青人的確有心有力。用心去經營嘅食店，我一定會再支持，更何況魔麵係我在九龍區暫時最滿意嘅拉麵店，值得推介俾大家。
在此，祝店方業務蒸蒸日上，客似雲來。
魔麵
尖沙咀厚褔街8號H8 2樓全層
============================================
感謝 kent1012 提供以上資料
kent1012http://www.kentxfood.com/
============================================
