日本拉麵近兩三個月有如雨後春筍，開完一間又一間，繼進駐中環嘅過江龍秀拉麵，太興集團新品牌築地拉麵後，仲有澳洲回流嘅亮亭，同埋灣仔風味拉麵店幸亭，整個拉麵界真係風起雲湧，熱鬧非常。而在尖沙咀河內道亦有東洋過江龍鳥華在香港設店，而且非常有特色，因為佢地就係全港第一間以雞做主題嘅拉麵店。
![]( "110511-01")
|
| 全港第一間以雞做主題嘅拉麵店 |
![]( "110511-02")
|
| 店內地方寬敞，坐得幾舒服 |
其實東京一早有以雞白湯做拉麵湯底，但香港黎講我記憶所及真係第一間。食慣豬骨，麵豉等湯底嘅我一知道香港有雞湯拉麵就即刻黎捧場。鳥華位置正係河內道香之香舊址，尖東港鐵站N1出口一出就係，非常就腳。
![]( "110511-03")
|
| 手瓜起展，食野唔駛俾錢? |
拉麵店地方非常寬敞，裝修都幾舒適，最吸引大家嘅應該係牆上果隻大隻雞水墨畫，莫非呢度「手瓜起展，食野唔駛俾錢？」錯喇～只係新開張期內唔駛收加一咋！
![]( "110511-04")
|
| 價錢中等，跟一般日本過江拉麵店相約 |
餐牌上面只有三款雞白湯拉麵(原味$65 / 辣味$69 / 味噌$75)供應，另外亦有一款有鴨胸冷麵($75)。一場黎到當然要試下雞白湯掂唔掂，所以今次叫左原味，另外加多$9要左一隻糖心蛋。如果中意咩都加嘅朋友，可以另加$35整個加料全餐，全餐有一隻糖心蛋，額外多三塊豚肉叉燒，三塊雞肉叉燒，仲有辣蔥同貢菜，食量大嘅朋友絕對值得考慮。
![]( "110511-05")
|
| 雞白湯雞味非常濃郁 |
幾分鐘後原味雞白湯拉麵送上，金黃色湯頭散發陣陣雞湯香味，湯含大量天然骨膠原同蛋白質，所以女士們不妨飲多兩啖。老習慣先飲一啖湯，雞味非常濃郁，感覺好似自家落重料煲嘅雞湯一樣好飲，據知呢個湯頭係用上大量雞肉，雞骨同雞腳熬左六小時先至做成，怪不得咁濃味，而且仲有少少油膩...
![]( "110511-06")
|
| 雞肉叉燒無咩驚喜 |
唔單止湯頭以雞代豚，叉燒亦一樣以雞肉叉燒代替。所謂雞肉叉燒其實只係切片燒雞，雞肉經秘汁醃過後味道中規中距，無咩驚喜。由於我見另加雞肉叉燒跟傳統豚肉叉燒同價，所以多口問侍應可唔可以將雞白湯拉麵內三塊雞肉改成豚肉，答案當然係無得改，原因係佢地希望客人可以真正試到雞肉拉麵的精髓，但「堅持」同「彈性」兩樣野，我諗大部人都中意後者...
![]( "110511-07")
|
| 麵質食落偏硬, 水準有改善空間 |
![]( "110511-08")
|
| 溏心蛋做得相當唔錯 |
麵條方面絕對係最弱嘅一環，雖然用上日本麵粉同配方，但一樣由本地麵廠代工做成，麵質食落偏硬而唔算彈牙，好彩鹼水味唔算嚴重，但嚼勁一般，感覺麻麻地，相比MIST更加係差距甚遠... 反而溏心蛋做得唔錯，半生熟蛋黃呈流心狀態，食落除感覺到蛋黃甘腴之外，亦帶有醬油甜味，比起秀，達磨等做得更好！
![]( "110511-09")
|
| 成碗雞湯飲晒!! |
毫無疑問以雞肉代替一般豚肉做出黎嘅日本拉麵，的確可以在鬥得你死我活嘅拉麵市場做出一點Noise，但食物質素能否一直保持水準先至係最重要。雞肉叉燒係唔係比傳統豚肉叉燒優勝就見仁見智，但麵條方面可唔可以改其他麵廠代工呢？至於雞白湯品質，我對佢有十足信心，單係睇我成碗飲晒就知啦！
鳥華拉麵
尖沙咀河內道5號普基商業中心地下3號鋪
============================================
感謝 kent1012 提供以上資料
kent1012http://www.kentxfood.com/
============================================
