去年豚王在中環迅速堀起，引發一陣拉麵熱潮，港島區幾間有實力嘅拉麵店被捧上神檯，拉麵迷不惜犧牲時間大排長龍，追求東洋味覺真諦。而MIST就係最強三間實力拉麵店中，唯一一間可以電話預訂座位，我自問係一個懶去排隊嘅人，所以最後決定用金錢換取時間...
![]( "100311-01")
|
| 每位廚師分工合作，用心為客人準備食物 |
預訂座位時已通知要坐吧檯位，呢個係我最愛嘅位置，當然絕對無問題啦。一邊等候美食，一邊欣賞開放式廚房內每位廚師嘅認真烹飪態度，都係一件賞心樂事。
![]( "100311-02")
|
| 令人興奮期待嘅麵餅 |
廚房一角放左一個好大嘅木箱，廚師每次都由內裡取出麵餅，然後一個個排好等放入湯。每次見到佢開箱，心入面都會諗：呢個麵餅係唔係我果碗呢？突然覺得，心情有如小朋友企在棉花糖機面前期待一樣，當時果種興奮心情，執筆時都覺得有啲低能...哈哈！
![]( "100311-03")
|
| 自家啤酒有非一般感受，好飲！ |
拉麵未到時，先送來呢度嘅自家Chabuya啤酒($50)，呢度啤酒有黑白兩款任你選擇，而我今次飲嘅白啤麥味較重，酒味唔算濃郁，而且亦有絲絲梅香，入喉感覺相當舒服醒神，值得推介！
喝幾口啤酒後，熱辣辣嘅豬骨湯拉麵剛好送來。先講一講呢度嘅湯底，有豉油、鹽味、梅鹽、味噌同埋辣蔥味噌五款，而最常見嘅豬骨濃湯底反而係呢度嘅Special，只會在星期五六日限量供應，午市晚市各賣三十碗，賣晒就無，估唔到豬骨湯反而係最矜貴...
![]( "100311-04")
|
| 豬骨湯麵 每日限定 |
豬骨湯麵($130)再加隻溏心蛋要收多$20，如果想要多塊叉燒就再加$25。單單係呢個組合，已經要$175一碗，價錢可能比起坊間任何一間麵店仲要貴。不過呢度嘅拉麵由日本三個產地嘅麵粉混合搓成，製作極為嚴緊，所以價錢定到咁高，都有一定道理。豬骨湯底食落唔會覺得太油膩，跟豚王果種傳統博多風味截然不同，怕肥的女士們或者覺得呢個較討好。麵條幼細彈牙，軟硬度剛好，而且筋性較低，有利吸取湯汁，質素實在非同凡響。
![]( "100311-05")
|
| 梅鹽味湯底清甜自然 |
![]( "100311-06")
|
| 麵條幼細彈牙，好食到不得了！ |
如果對豬骨湯油膩有忌諱的話，味道較清新嘅梅鹽味湯底或者較適合你。簡單清湯，入口清甜自然，酸梅肉香瀰漫整個金黃色湯底，微酸感覺，食落跳脫醒神。另一方面，溏心蛋做得好好，一切恰到好處，叉燒用上千葉縣豚肉，肥瘦均勻，水準相當高，但就個人而言，卻喜愛豚王果份食落更豪邁嘅口感。
![]( "100311-07")
|
| 賣相吸引，但味道很快就忘記... |
MIST餐牌內除左拉麵之外，亦有唔少創意料理，就好似呢份拉麵壽司($110)，四隻小匙羹上放上由拉麵捲製而成嘅壽司，分別放上海膽、吞拿魚他他、植菇同埋鱈魚籽，賣相絕對係吸引。不過我覺得純粹只係綽頭，感覺跟某店嘅海南雞壽司一樣，上下兩層貌合神離，味道平凡無特別，所以如果唔係想影相的話，絕對唔建議浪費呢$110。
![]( "100311-08")
|
| 幸福麥豬實在令人食得幸福流淚 |
反而另一個櫻花木燻千葉縣幸福麥豬($130)就真心精彩，落單時侍應定必會問你想要肩肉定係腩肉，我反問邊個部位較好食，笑容滿分嘅侍應姐姐推介腩肉，佢話口感較好而且較香，所以我都決定聽佢話。煙燻豬腩肉香味濃郁，半溶水牛芝士令口感更有層次，而且黑椒汁份量不偏不倚，將豬腩肉味完完整整散發出黎，加上淡淡櫻花木香味，實在搵唔到要挑剔嘅理由，呢個菜式實在色香味俱全，誠心推介！
![]( "100311-09")
|
| 心大心細的話，不妨先來食一個午餐 |
今次呢餐三人行埋單$840，無可否認唔係人人可以接受呢個價位，而且大家一定話有更多選擇。甚至會好正常咁同達磨、豚王等直接作比較，如果以麵條質素來講，我覺得MIST真係無懈可擊嘅王者，而湯底、溏心蛋同叉燒方面就各有千秋，尤其後者，應該可以有改善空間。但考慮到其他菜式，以及環境服務，仲有果枝出色嘅自家啤酒，MIST的確值得大家黎幫襯，如果嫌貴而心大心細的話，不妨考慮用壽司店扒房常用嘅攻略模式，到來食一個午餐吧！
創作麵工房銅鑼灣新會道4號地下
============================================
感謝 kent1012 提供以上資料
kent1012http://www.kentxfood.com/
============================================
