伙頭智多星呢套動畫相信陪伴好多朋友成長，縱使內容誇張，但至今仍然令我津津樂道。友人曾提及在銅鑼灣堅拿道西嘅盛八食堂中，牆上貼上伙頭智多星味吉陽一的漫畫，再加上食堂兩個字，令我極想到呢度走一趟，加上天氣嚴寒，食一碗暖暖嘅拉麵的確係唔錯，所以決定動身起行了...
![]( "080111-01")
|
| 味吉陽一漫畫作裝飾，背後有野心嗎？ |
![]( "080111-02")
|
| 漫畫中味吉洋一(右)敗於中江兵太(左)手下... |
店子面積好細，空間不大，只能夠容納約廿多個客人。一邊牆紙上係味吉陽一的漫畫，漫畫內容係味吉陽一跟中江兵太決戰嘅一幕，老闆選用這個劇情似乎係另有用心。原因係味吉陽一在漫畫版故事中，曾敗陣於中江兵太手下，而中江兵太正好係拉麵高手，跟盛八食堂主打的拉麵不謀而合，莫非老闆對其拉麵咁有信心？
![]( "080111-03")
|
| 盛八極上黑豚叉燒拉麵，餐牌賣相唔錯 |
信心還信心，味道先至係決勝關鍵。店員向我介紹有一款伊勢海老湯底松葉蟹拉麵，但我眼見旁邊有位女士正在食呢款拉麵，食物賣相似乎有點地雷感覺，所以決定由最簡單基本入手，點了呢個盛八極上黑豚叉燒拉麵($59)。
![]( "080111-04")
|
| 味噌湯底雖然唔錯，但豬骨湯似乎更合我口味 |
盛八極上黑豚叉燒拉麵送上，心入面不禁一寒，賣相真心覺得麻麻，突然擔心我呢個會唔會都係一個地雷... 先試一湯頭，幸好味噌湯底味道對辦，質感亦夠豐厚，以呢個價位黎講算係唔錯，當然唔可能同過百蚊一碗拉麵嘅MIST相提並論。
![]( "080111-05")
|
| 麵質過硬...因為午市粗製濫造嗎？ |
麵質方面，過於煙韌，質感亦唔夠爽滑，而且麵條索湯能力亦好差，失望至極。不只拉麵本身，甚至配菜中嘅銀芽，木耳，蔥花，全部都好硬，或者可能係廚師午市趕時間手快快吧！
![]( "080111-06")
|
| 太薄，試唔真味道.... |
黑豚叉燒切得好薄，薄得好難去分辨係唔係黑豚肉，不過盛八以賣肉類起家，應該有一定信心。外觀上肥瘦均勻，味道總算豐腴，但一夾就散，薄得可憐，當時真心想問一下有無分厚切？有嘅話唔該整塊厚嘅俾我...
![]( "080111-07")
|
| 溏心蛋出奇地好，希望水準可以保持！ |
溏心蛋卻出奇地做得唔錯，溏心效果做到應有水平，蛋味亦夠香，加上味噌湯，好味。這小小的半隻溏心蛋，味道的而且確比起人氣的豚王，達磨等出色，不過一碗好嘅日式拉麵，湯底麵條先至係最重要，希望店子可以多加留意...
希望小店可以用心煮出令人感動嘅拉麵，如要煮出陽一的水準，都係努力吧....
盛八食堂
灣仔堅拿道西15號永德大廈地下G17號舖
============================================
感謝 kent1012 提供以上資料
kent1012http://www.kentxfood.com/
============================================
