荔景酒樓係我廿年來每個春節必到嘅晚飯地方，完全因為有親戚跟呢度相熟，所以每年都會到呢度擺壽宴。廿年來，我由不懂欣賞，直至今次舉腳讚好，原來屋邨酒家都有悅目搶鏡嘅時候...
![]( "180211-01")
|
| 乳豬皮香肉脆 |
![]( "180211-02")
|
| 龍蝦大大隻，配上伊麵格外好味 |
飲宴先來嘅當然鴻運乳豬全體同上湯龍蝦，乳豬香脆而不肥膩，肉咬落香濃而唔鹹。澳洲龍蝦大大隻，有高湯及伊麵襯托下格外好味，龍蝦腳直徑跟五毫子相約，整條拔出黎放入口，相當過癮。
![]( "180211-03")
|
| 新年點會少得呢樣... |
呢餐雖然係壽宴，但老人家總愛在新年食發財好市，所以呢餐亦自然有呢樣菜式出現。蠔豉味道雖好，但件頭略細，嚼勁一般，加上發菜跟乾瑤柱只係一般貨色，都係淺嚐攞個意頭就算。
![]( "180211-04")
|
| 翅湯做得出色 |
![]( "180211-05")
|
| 真材實料，掂！ |
近年好多人鼓勵宴席唔食魚翅，老人家當然無視一切，照食可也，而我亦懶理道德高地，盡情享用紅燒蟹肉生翅。蟹肉雖然唔係生拆，但翅湯做得相當唔錯，唔會落太多生粉做芡，而且翅群唔係平價貨，口感令人滿意。
![]( "180211-06")
|
| 鵝掌注定只能做配角 |
食完翅後來個鮑魚扣玉掌，鮑魚幾多頭無所謂，最緊要扣得入味又夠腍。溏心鮑魚切開時有啜刀感覺，味道甘香，口感軟熟之餘帶少少煙韌，完全將玉掌風頭盡蓋。最後剩餘只有鵝掌，但鮑魚我就食左兩隻半了...
![]( "180211-07")
|
| 老虎斑 |
老虎斑跟炸子雞呢對孖寶，飲宴場合總會出現，不過今次我前段去得太勇悍，而且有我至愛嘅饅頭做壓軸重頭戲，加上胃納有限，兩者都無奈放棄，但聽聞味道係相當唔錯的。
![]( "180211-08")
|
| 水餃生麵睇樣就知掂 |
![]( "180211-09")
|
| 好食到食唔晒都要打包～ |
水餃生麵糯米飯每年都有得食，然而廿年黎一直保持應有水準，賣相亦可見有幾對辦，尤其係水餃做得皮邊薄餡料豐富，非常好味。但若非有強悍戰鬥力，否則都難以避免要打包拎走嘅命運...
![]( "180211-10")
|
| 炸饅頭外層脆卜卜，入面鬆軟帶甜 |
![]( "180211-11")
|
| 蒸饅頭鬆軟好味 |
留力到呢個地步，只為最愛嘅金銀饅頭。由於我家特別多人中意食饅頭，所以特意安排每圍有四打金銀饅頭，聽起上來數量好似好驚人，但其實我單人匹馬已KO左十三隻！點解食咁多？因為好食咯！饅頭鬆軟又略帶少少甜味，入口輕如無物，煉奶都唔駛蘸已非常好味！
呢圍酒席如果換上尖沙咀或銅鑼灣區酒家，價錢相信動輒至差唔多五位數字一圍，而今晚荔景只收六千一席，我就覺得非常抵食。就算呢度無豪華靚裝修都好，但意料之外嘅食物質素跟服務態度，寄望不久將來可以再來，享用更上一層數嘅宴席。
荔景酒樓葵涌荔景邨
============================================
感謝 kent1012 提供以上資料
kent1012http://www.kentxfood.com/
============================================
