鮨醉在尖東

去年八月友人介紹到港晶中心地庫嘅鮨海，一直對其精彩嘅刺身壽司念念不忘，今次一班多年好友相約新春飯局，決定再次到呢度，美酒佳餚，談笑風生，大家不亦樂乎。鮨海大廚蒹老闆正係雲海工作多年嘅主廚，來頭不少，亦有信心保証。隱身尖東地庫後，質素保持不變，但收費亦較以前雲海平幾成，老饕實在非常有福。 

雞泡魚乾佐酒實在一流



朋友特意訂嘅紅酒

未上餐前，當然先飲酒。朋友由法國特意訂回來嘅紅酒，口感極順，輕搖酒杯讓香氣釋放，再以美味非常嘅雞泡魚乾及枝豆佐酒，絕對係人生一大享受。

不一樣口感嘅新鮮八爪魚刺身


刺身壽司係鮨海必殺技，食材用料新鮮，不時不吃，由於老闆要求甚高，所以Omakase係最好選擇。今次老闆推介是日新鮮運到八爪魚刺身，八爪魚新鮮味美，咬落跟平時有不一樣口感，尤其係吸盤部份，爽滑鮮甜而不失嚼勁，非常好味。

當造針魚刺身質素非常高


意猶未盡之際，送上另一盤刺身，其中正值當造期嘅針魚刺身，更令眾友人讚口不絕，針魚外表銀白滑溜帶光澤，食落肉質鮮美非常，質素非常高。

金黃色嘅海膽，入口即溶


上次到鮨海時，老闆話當日海膽唔夠靚，所以無比我地，亦今次終於有機會試到喇！之前提及過呢度壽司飯團部份做得好好，今次到來水準依然，唔會令人失望。金黃色嘅海膽味道鮮甜，入口即溶，整件放入口，唔駛蘸豉油更加能嚐到真正鮮味，實在正到暈。

繼續追尋海膽鮮味...

既然壽司飯手握技術到家，可不追加來一個手卷？其他友人雖然選左同樣美味嘅拖羅手卷，但我本身對海膽情有獨鍾，決定繼續沉醉海膽鮮味中，口感豐富，紫菜爽脆，掂呀！
其實其他熱食一樣精彩，燒鯖魚，燒虎蝦，天婦羅都係水準之作。詳細可以參考我較早前嘅另一篇食評，連結如下：
這夜…我心盪漾在鮨海中


紅豆燒年糕，完美的結局


上次埋尾食嘅紅豆燒年糕，今次決定要老闆encore，可惜我今次又掛住傾計，再一次放涼左，哈哈！唔緊要，如此高水準，當然下次會再來！同時亦要多謝老友請客及提供美酒，希望下個月私房菜飯局更精彩...


鮨海尖沙咀加連威老道100號港晶中心地庫第一層54-57號舖

============================================

感謝 kent1012 提供以上資料

kent1012http://www.kentxfood.com/

============================================