到紅館睇演唱會前，大家通常晚飯會食乜？可能好多朋友都會貪方便喺尖東食，不過想食得經濟的話，來來去去都係果幾間，悶爆！今次就介紹另一間又平又好味嘅俾大家，但地點唔係尖東，而係另一邊紅磡曲街附近嘅生記膏蟹粥...
![]( "310810-01")
|
| 生滾蟹膏粥 |
![]( "310810-02")
|
| 金黃色嘅蟹粥，令人垂涎三尺 |
呢間小店唔太起眼，如果大家有聽過老坑火鍋，咁就應該唔難搵。呢度嘅生滾蟹膏粥同埋蟹膏湯伊麵相當出名，不過我地今次一行四人，胃口亦有限，所以主力目標先試生滾蟹膏粥，呢個3-5人用特窩份量足有８碗，價錢只係$128，相當抵食！
蟹膏粥底加入腐皮同薑絲，聞落已經好香，食落仲好滑添，只係略嫌落鹽重手左少少，不過整體上影響唔太大。然而蟹膏早將整煲粥染成金黃色，已足夠令愛食蟹嘅我流晒口水...蟹蓋一向係我至愛，尤其係多膏嘅重殼蟹更加係「賣飛佛」。將蟹蓋內重皮部份撕開，再浸一下碗裏面熱氣騰騰嘅粥，鮮味無比，令人難忘！
![]( "310810-03")
|
| 八爪魚丸出奇精彩 |
炸八爪魚($25/6粒) - 大大粒嘅八爪魚丸係呢度名物之一，外層炸得金黃香脆，入口彈牙夠結實，八爪魚肉鮮味十足，佐酒絕對一流！
![]( "310810-04")
|
| 冬陰公有意外驚喜 |
鑊仔冬陰公浸蜆($65) - 估唔到小店做冬陰公都似模似樣，味道唔輸蝕比泰式餐館，酸辣度適中，相當討好。雖然蜆肉細細粒，無食花蛤咁過癮，但勝在夠鮮味，一邊食一邊歎口湯，滋味無窮！
![]( "310810-05")
|
| 避風塘茄子希望下次有進步，今次不行了 |
避風塘茄子($29) - 茄子部份係唔錯，起碼做到外脆內軟，不過炒得唔夠香口，食落亦無預期果種避風塘感覺。友善嘅老闆娘前來問意見，已將呢個「避風塘」問題反映，希望下次到黎會有進步。
最後埋單每人平均都唔駛$70，實在抵到爛。呢餐蟹粥，實在滿足！
生記茶餐廳
紅磡老龍坑街13號地下
============================================
感謝 kent1012 提供以上資料
kent1012http://www.kentxfood.com/
============================================
