金秋十月

九月睇雜誌時，得悉銅鑼灣廣場韓雅林旁邊，開左一間以食新鮮水產為主打嘅日本餐廳魚八水產，愛食魚生刺身嘅我早已決心要到來體驗一下，結果苦盡甘來，最後要等到十月才有時間到此。而九月至十月中，正好係食秋刀魚刺身季節，亦係本人生日的月份，所以好想將呢篇食評，在今日送俾自己...


色彩繽紛，教人垂涎三尺

 一入門口就見到一個好大嘅海鮮櫃，由右邊嘅帆立貝，廣島蠔，牡丹蝦...到左邊嘅魴鮄，秋刀，金目鯛等等...樣樣都新鮮到不得了，色彩繽紛，教人垂涎三尺。


秋刀魚油脂甘香


原條秋刀魚刺身($148) - 據知今年日本秋刀魚產量比起去年少左好多，身價自然上升，所以唔想失之交臂，預訂一條，來到才知原來真係搶手貨，晚市黃金時段前早已沽清。時令嘅秋刀魚刺身，基本上唔會差得去邊，而呢份刺身厚度切得剛好，約1cm一件，最好就係咁。加薑茸蔥花一齊食，肥美豐滿，油脂甘香，細味下肉質嫩滑，魚味極濃，美味非常，完全無失望！精彩！


金目鯛刺身鮮美細緻


金目鯛刺身($138/5片) - 金目鯛來自日本伊豆，係日本料理常見嘅高級食材，所以價錢都唔平，之前新開張優惠價$90就食到一客，依家優惠期完左又加上日元高企，身價亦貴左好多。金目鯛不單止外型吸引，肉質緊實富有彈性，而且口感鮮美細緻，絕對值得！


魷魚豉油漬爆發出不一樣的味道


魷魚豉油漬(有肝) ($48) - 如果中意飲下酒，不妨叫呢個魷魚漬試下喇！味道初嚐時，有少少似螢光魷魚鹹香感覺。其實係用豉油同清酒，將釀入內臟嘅魷魚一齊醃製而成。或者有人會好怕果種腥味，但雪得冰凍嘅魷魚將果種鮮味抑壓住，入口後慢慢爆發出黎，感覺實在係正到爆，絕對不試不可！


魚八風什錦海鮮壽司食得豪快


魚八風什錦海鮮壽司($148) - 呢份壽司分別由蟹肉、三文魚籽、海膽、三文魚同埋吞拿魚蓉組成，下面由八件青瓜絲小卷墊底。賣相跟平時所見壽司最唔同嘅地方，就係旁邊多左隻大匙羹，目的就係可以俾大家豪快地品嚐。大家可以不顧儀態，一口氣將咁多樣材料放入口，其中最精彩莫過於將三文魚籽同海膽，鮮味強烈，食得痛快無比，爽！

煎蛋卷有水準


開始點熱食部份，第一個送到來嘅係明太子芝士煎蛋卷($58)，芝士味唔濃烈，但為煎蛋卷加添幾分幼滑，最精彩部份應該係較辛口嘅明太子，辣味加上鹹香，跟芝士蛋卷好大對比，整體口感軟熟，好食。


食唔出豆香及風格


自家製厚燒豆腐($38) - 一客四件厚身豆腐，上面只係木魚絲，亦食唔出豆香及風格，咬落亦感受唔到層次，除非你係豆腐狂，否則搵唔到要試嘅理由...


極有咬口，肉汁豐盈


串燒牛舌($30/串) - 落單時完全無諗過，呢度嘅串燒牛舌係咁好味！牛舌燒得好甘香，食起上黎極有咬口，而且肉汁豐盈，水準跟鳥羽嘅串燒有得揮，下次到來一定要其他！


黯然失色...


荔枝煙肉卷($28/串) - 相比起串燒牛舌，呢個荔枝煙肉卷實在印象唔深，如果唔係八王子再無得食荔枝豚肉串，我亦未必會突然想食呢個。言歸正傳，煙肉鹹味適中，唯獨荔枝發揮唔到應有嘅味道，令整條串燒黯然失色...


燒榮螺爽脆又唔韌


燒榮螺($88/隻) - 在門口嘅海鮮櫃中，老早已盯上左榮螺，就來一客。榮螺有接近拳頭大小，將螺肉全起出黎切成細粒，再用跟醬油及清酒放回螺殼內煮熟。螺肉吸收左醬汁精華，食落肉質甘甜又鮮味，咬落爽脆又唔韌，食完飲一口生啤，極滿足！


燒廣島蠔鮮味無比


燒廣島蠔($48/隻) - 食完燒榮螺，意猶未盡，再來廣島蠔。加上蒜蓉鹽味醬去燒，聞落香味撲鼻，食落鮮味無比，蠔味比起桶蠔更出眾，滿足度再度提升！


士多啤梨雪葩部份更搶鏡


飽餐後當然想食個甜品，呢個博多甘王士多啤梨雪糕($28)真係夠晒養眼，士多啤梨雪葩混上牛奶雪糕，粟米片，再加上威化餅同埋糖粒Topping，好好味，尤其係士多啤梨雪葩部份，直頭搶晒鏡！
魚八水產開業不足兩個月，服務上仍有不少需要改善嘅地方，尤其係某些高級侍應對食物基本知識唔太熟悉，間接令人質疑其服務水準。只要能好好改善呢個問題，以其價廉物美新鮮食材作招徠，生意一定會更好。希望不久將來可以再次到來，吃一次汁煮喜知次，整件事就變得完美了！


魚八水產
銅鑼灣軒尼詩道489號銅鑼灣廣場1期6樓6A號舖

============================================

感謝 kent1012 提供以上資料

kent1012http://www.kentxfood.com/

============================================