利苑式風味 小館添驚喜

近四十年歷史嘅利苑酒家，一直走高級食肆唔線，亦係好多愛食點心嘅香港人至愛。而利苑集團最近在時代廣場開左呢間“利小館”，希望以更經濟嘅價錢將粵菜點心推廣俾大家。今次特意到利小館午餐，睇下呢個全新品牌會唔會帶黎味覺新驚喜，定係重蹈當年利苑美食廣場慘敗嘅命運....


陳醋詹耳爽口醒神

 陳醋詹耳($38) - 黑木耳加上洋蔥絲，再以黑陳醋拌勻，感覺清新爽口，酸酸嘅味道震撼味蕾，天氣咁熱，呢個醒胃小食最合胃口。


蜂巢芋盒炸得好似玫瑰花一樣精緻

 蜂巢芋盒($22) - 我每次嘆茶食點心，見到芋角必定會叫一客，而且呢個係利苑名物，所以更加係不試不可，單係外形炸得好似玫瑰花一樣精緻，未食已令人心動...


芋泥夠粉，肉餡亦鹹香十足

 芋盒入口感覺唔油膩，更聽得出外層非常鬆脆，功夫絕對到家。中間芋茸部份做得好好，芋泥夠粉香，肉餡亦鹹香十足，掂！


蘿蔔絲酥餅水準極高

 蘿蔔絲酥餅($22) - 跟蜂巢芋盒絕對係呢度香脆點心嘅孖寶，酥餅外皮香脆討好，熱辣辣嘅蘿蔔絲切成粗條，口感豐富之餘，蘿蔔味亦相當濃郁，可見利小館點心師傅水準不比利苑遜色...


餡料肥瘦適中，包身軟滑

 蠔皇叉燒包($16) - 如果食點心無食過叉燒包，總覺得有一點遺憾。呢度叉燒包餡料肥瘦適中，包身軟滑剛好，水準之作。不過如果可以稍為裂開露出餡料，令叉燒香味散發出黎就更加完美喇～！


椰皇燉鷓鴣值得一試

 椰皇燉鷓鴣($58) - 聽個名都知係滋補湯水，呢個價錢值得試下。將鷓鴣、蛹蟲草、杞子、雞、瘦肉等茵入椰皇燉成，雖然搵晒成個椰皇都見唔到鷓鴣蹤影，但充滿椰香嘅湯水真係好好味，而且面層無多餘嘅油，感覺清潤無比，值得一試！


四川酸辣湯難食到不得了

 四川酸辣湯($35) - 利小館其實每樣食品都在水準之上，甚至有令人回味無窮嘅感覺。但呢個酸辣湯完全係難食到不得了。酸辣湯本屬開胃食品，而且醬油同黑醋比例應該要配合得好好，但呢個湯完全無酸味，辣味太嗆鼻又欠缺香味，只得一個鹹字，可以用兩個字形容：把鬼！


好似冰粒般嘅大小，貴精不貴多

 冰燒三層肉($68) - 單睇價錢同份量，可見利小館對呢個菜式有十足信心，實行貴精不貴多。三層肉就係指以五花腩肉燒製而成嘅燒腩仔，再切成好似冰粒般嘅大小，故名為冰燒。


享盡感官三重天

 三層肉肥瘦均勻，脆皮、肥肉、瘦肉三層分明。表皮厚身夠香脆，少少淮鹽味相當精彩，中間脂肪層油脂豐厚，香而不膩，而底層瘦肉嫩滑細緻。食完終於明白點解會賣到呢個價錢，始終要令食客一口享盡感官三重天感覺，絕非易事。


紅燒獅子頭夠精彩

 紅燒獅子頭拉麵($45) - 利小館嘅獅子頭做得極精彩，外層炸得色彩夠鮮艷金黃，入面肥瘦肉均勻，燉得柔軟入味；而馬蹄粒切成粗粒，嚼頭倍增。麵質方面彈牙有咬口，大白菜亦夠翠綠鮮甜，唯一美中不足係湯頭只屬一般...


荷葉污糟雞嫩滑無比

 荷葉污糟雞($68) - 雪白嘅清遠雞肉配上薑片、冬菇絲，再用何來荷葉包住蒸熟，雞肉入口嫩滑無比，鮮味極為突出，而且亦感受到陣陣荷香，非常好味，但點解呢個順德名菜叫污糟雞就不得而知喇～！


一口高力豆沙餡香味足

 一口高力豆沙($28) - 完全被個名呃晒，本以為係一啖一隻嘅迷你高力豆沙，但原來仍然係網球咁大個。高力豆沙咬落夠軟綿，豆沙餡香味足，而且唔會太甜，面層糖霜落得剛好，唔錯～！


始創楊枝甘露見証香港人創意

 始創楊枝甘露($24) - 由利苑所創製嘅楊枝甘露，果然正宗係最好食，沙田柚肉肉同芒果肉嘅結合完全見証香港人創意同努力。呢度楊枝甘露口感非同凡享，同出面其他甜品店東施效顰相比，絕對不一樣感受！


服務質素可以有改善空間

 總括今次利小館體驗，我覺得服務質素亦最需要改善嘅地方，始終大家對利苑呢個品牌有一定要求，就算只係小館，服務質素應該可以做得再好少少。至於食物方面，除左果個難食得可怕嘅酸辣湯外，基本上其他菜式都幾有水準，價錢方面仍未見大眾化，但門檻已明顯降低，教人接受，值得大家再去。


利小館銅鑼灣勿地臣街1號時代廣場地庫2層B217-B218號舖

============================================

感謝 kent1012 提供以上資料

kent1012http://www.kentxfood.com/

============================================