知道呢間鳥羽名古屋料理餐廳已有一段日子，但遲遲都未有機會試到，但試完之後竟有一種相逢恨晚嘅感覺！唯一可惜今次午市到來，下次晚餐一定要再嚟呢間居酒屋狂食串燒豪飲清酒！
![]()
|
| 一般居酒屋格局 |
餐廳裝修係一般居酒屋格局，由於樓層面積細，所以分左上下兩層。上層係一般堂座座位同廚房吧位，而下層就係獨立廂房同塌塌米。
![]()
|
| 清酒牆 |
上層嘅牆架上放滿左琳瑯滿目嘅330毫升瓶裝清酒牆，如果大家睇中有心水就咁拎落黎就得，每支盛惠$78。
![]()
|
| 吧檯位前好多清酒 |
吧檯位前亦放左好多清酒，作為裝飾當然吸引，好多仲好想試添...可惜午市到來，唔想賣醉，唯有等下次...
![]()
|
| 筷子托 |
簡單而又充滿居酒屋感覺嘅筷子托...I Like it...
![]()
|
| 三文魚沙律 |
午市套餐前菜有呢個三文魚沙律，一貫預料嘅味道，但勝在用料新鮮，沙律酸汁味道亦討好，開胃清新，唔錯！
![]()
|
| 名古屋秘製手羽先唐揚($48/5隻) |
名古屋秘製手羽先唐揚，有分原味，中辣同大辣三款。今次叫左中辣試，辣度適中係我還可接受嘅程度。我之前睇過唔少關於呢味炸雞翼評價，絕對係毀譽參半，因為佢唔係肥大肉厚，啖啖雞味果種，而係燒得乾身惹味，最適合佐酒果種。其實雞翼本身用左咩醬料烹調我唔打算去理，味道係點心裡有數，總之我食得開心過癮就夠...
![]()
|
| 砂肝唐揚($38) |
酥炸雞腎是也！炸得火喉啱啱好，入口唔會太乾，咬落亦唔韌，絕對係一級佐酒小食。
![]()
|
| 串燒牛舌($28) |
牛舌質素其實只係一般貨色，但勝在師傅功夫到家，燒出黎嘅牛舌幾有水準，而且竟可以燒到Medium Rare，實在有啲意外驚喜！
![]()
|
| 串燒廣島蠔($28) |
外型上其實真係幾肉酸，好似隻蠔火災中劫後餘生咁，點知入口蠔味十足，味道又真係唔錯，不過我就覺得貴左少少～
![]()
|
| 照燒雞扒飯set($85) |
正食之一就係呢個照燒雞扒飯set，賣相唔錯，照燒醬汁份量剛好，唔會搞到成碗飯太濕，而且雞皮燒得乾身薄脆，雞肉亦有咬口，唔錯～！
![]()
|
| 雜錦刺身飯($128) |
正食之二就係雜錦刺身飯 - 三文魚，鱆紅魚，帆立貝，八爪魚，海膽，牡丹蝦，蟹籽，蟹柳，玉子，墨魚... 十種食材九個精彩，唯獨玉子未到家，有如其他港式小店質素～不過如果中意食雜錦刺身飯嘅朋友，呢個絕對滿足到你！
![]()
如果堅持要食到地道名古屋風味的話，黎到鳥羽或者會破口大罵，但平心而論呢間餐廳食物質素，服務態度同埋價錢收費上，都係相當合理而且高水準。邊食邊回看餐牌，想試嘅仲有好多，下次有機會一定一班好友黎呢度開懷暢飲，每樣串燒佐酒小食都慢慢品嘗先得！
鳥羽名古屋料理銅鑼灣駱克道489號駱克駅21樓
============================================
感謝 kent1012 提供以上資料
kent1012http://www.kentxfood.com/
============================================
