尖沙咀iSquare雖然食店眾多，但下層商場果幾間，好食吸引真係無乜。想轉戰樓上，其中有兩間價錢太貴，另外幾間中式食肆亦唔太吸引，於是到呢間名家韓國餐廳一試...
![]()
|
| 原來係世貿果間嘅分店 |
乘坐完電梯一去就見到門口，已覺熟口熟面，原來就係銅鑼灣世貿中心果間嘅分店...
![]()
|
| 窗口位要在訂位時事先要求 |
兩店同樣擁有嘅就係一個共同之處就係開揚靚景，當然訂位時記住先出聲話要窗口位啦！可惜去果日太大霧，窗外一片白茫茫，大煞風景...
![]()
|
| 大堆頭小碟頭伴菜 |
食韓國菜基本動作，就係送上大堆頭小碟頭嘅伴菜。四人前來送上八小碟伴菜，份量唔算多，味道方面，泡菜乏味，款式無新意，質素上無碟合格，係我記憶中去過嘅韓食店中最差嘅一間...
![]()
|
| 南瓜粥 |
除左伴菜外，侍應每人奉上一碗南瓜粥，我唔食南瓜無試到，但聽聞幾好飲...
![]()
|
| 韓式和牛粒 |
有禮貌嘅侍應送上幾件韓式和牛粒話俾我地試下，味道係可以嘅，不過食落去只係碎牛粒，完全想像唔到"韓式"同"和牛"嘅感覺...
![]()
|
| 大牛肋骨併盤(無醃)($238) |
食韓式燒烤，牛肋骨係絕對唔少得，呢份名家精選大牛肋骨併盤(無醃)份量都唔少，而且賣相係可以嘅，當然燒烤前有專人為你先剪開...
![]()
|
| 牛味依然令人滿足 |
呢度嘅牛肋骨併盤有分醃左同無醃兩種，不過想試清楚真正味道，俾多十蚊要個無醃會好好多。味道食落雖然同韓雅林同莊園仲有好大段距離，但牛味依然令人滿足，呢個價位算唔錯食得過...
![]()
|
| 牛脷($100) |
牛脷份量都唔少，而且切得夠薄身，燒起上黎會較易控制，而且肉身醃得好入味，食落煙煙韌韌，好味！
![]()
|
| 鮮帶子($140) |
鮮帶子有八大粒，咬落好厚肉，算係新鮮幾好味，不過抵唔抵就見仁見智喇～
![]()
|
| 韓國本土啤酒 |
食韓燒飲啤酒可以無咁熱氣，而呢度有幾款韓國本土啤酒供應，好似OB，Cass，Hite都有，淡淡地大家可以試下...
![]()
|
| 香辣炒八爪魚($180) |
呢份香辣炒八爪魚比起之前介紹果幾款主角更吸引，八爪魚鬚混埋泡菜同辣醬一齊炒香，食時再加埋芽菜咬口十足，而且香味四溢，辣味無窮...正到爆！不過真係愈食愈辣，唔係咁食得辣就要小心！
![]()
|
| 菜肉餃子($55) |
想要一份飽肚嘅菜肉餃子，但被價錢呃左以為唔會太大份，點知原來份量係咁多，餃子size成粒燒賣咁，一啖一隻食得好過癮，而且仲幾好味添，下次有機會都會再食！
![]()
|
| 甜爆西瓜 + 自家製柚子蜜 |
飯後甜品除左甜爆嘅西瓜之外，仲有一碗自家製嘅柚子蜜，食完真係成個喉嚨舒服晒，唔會覺得熱氣添～！呢餐好飽好滿足，但估唔到呢餐炒八爪魚同餃子比起烤肉硬好...有趣！
名家韓國餐廳尖沙咀彌敦道63號國際廣場(iSquare)27樓2702號舖
============================================
感謝 kent1012 提供以上資料
kent1012http://www.kentxfood.com/
============================================
