黎緊就係母親節，好多朋友都會同媽咪長輩飲個午茶，如果大家唔想淨食廣東點心咁悶棍的話，大家不妨考慮黎旺角新世紀廣場湘川滬試下。呢度除左廣東點心之外，亦有上海點心同埋好多地道四川江南家鄉小菜，而且價錢仲幾抵添...
![]()
|
| 蜜汁叉燒酥($9) |
相當有驚喜，酥皮微脆，面層陣陣芝麻香味令人流晒口水，入面叉燒餡料雖然唔算好多，但勝在蜜汁豐富，食得滋味...
![]()
|
| 燒賣皇($10) |
蟹籽估唔到脆卜卜，入面隻蝦仲要幾大隻，呢個價錢黎講絕對係抵食啦～！
![]()
|
| 馬拉糕($9) |
呢度嘅馬拉糕好鬆軟好香，比起依家嘅蓮香樓真係好上好多倍，無論老人家同小朋友都啱食，必叫！
![]()
|
| 鮮蝦腐皮卷(20) |
雖然價錢上比起其他點心係貴左少少，但食落就知係值得。聽得到嘅腐皮香脆，食得到的蝦肉鮮味，掂呀～！
![]()
|
| 流沙奶皇包($9) |
餡料完全唔流沙，食落好乾，奶皇香味亦唔夠，完全可以用失敗去形容，極唔掂～
![]()
|
| 乾嘅... |
有無講得咁差？大家即管睇下，你有無見過咁乾嘅流沙奶皇包？
![]()
|
| 小籠包($13) |
外型睇落麻麻，但食落又唔太差，起碼皮薄多汁熱辣辣，如果唔係要求太高，應該會收貨～
![]()
|
| 三鮮鍋貼($13) |
呢個大家黎到絕對可以無視，皮厚餡少底部煎得唔夠脆，用來頂肚都仲有其他好選擇..
![]()
|
| 回鍋炒蘿蔔糕($25) |
將蘿蔔糕切成粒狀先炸香，再用整回鍋肉嘅方法炒香，真係極惹味，好好食～而且價錢仲要咁平，大家無理由唔試下～
![]()
|
| 脆炸臭豆腐($23) |
望落雖然炸得有少少過左火，但豆腐依然保持到外層香脆，入面亦保留到果份令人雀躍嘅獨特口感，食落唔太油膩，就算老人家食都無問題，正呀！
![]()
|
| 紅燒雙冬珍珠膠($49) |
雙冬即係冬菰同冬筍，同埋花膠一齊紅燒當然係好味又有益，想媽咪青春常駐，皮膚滑淨，就不妨試下，份量咁多都幾抵食架～
![]()
|
| 圓肉桂花糕($10) |
味道清淡又不失桂花香味，呢個飯後甜品的確唔錯...
![]()
|
| 預祝各位母親節快樂~ |
呢度茶錢每位$6，絕對唔貴，而且點心價錢幾平，十二點前落單的話，就算頂點都係$14，小點就$8就有... 媽咪見到你地食得咁精明，一定都會開心啦！大家一於早少少起身同媽咪黎試下，預祝各位母親節快樂～！
湘川滬旺角太子道西193號新世紀廣場7樓709-712號舖
============================================
感謝 kent1012 提供以上資料
kent1012http://www.kentxfood.com/
============================================
