泰美味

又來到不定期的婦女兵團聚會，上次一行四人去了西貢吃海鮮，今次大家都想揀一間靜靜地、坐得比較舒服，食物質素唔錯，但價錢又相對經濟的餐廳。記得位於天后的《曼谷泰菜》，早前由留仙街搬咗去英皇道的晉逸維園精品酒店地下，搭電車經過，見地方寬敞，裝潢華麗，而且門面新淨企理，提議一試，豈料友人嫌交通唔方便，反而建議去其灣仔分店，我當然舉手贊成。其實兩間對我來說，都一樣咁方便，反正灣仔店之前去過，深覺水準不俗，而且除傳統泰菜外，更有些創意十足的新鮮選擇，就一於拍板這間。



雖然已經有超過年半沒來，但裝潢和上次到訪時分別不大，仍舊以啡木色為主調，配襯米黃色沙發和泰式木刻擺設，充滿泰國風情，安座其中，差點還以為自己是身在曼谷某處，而不是灣仔鬧市添。至於點餐任務，這晚就決定交由好友負責，我就樂得清閒，一於等食。

安頓後先點飲品，三位好姊妹不約而同，揀了椰汁三式珍多冰 ($32)，這杯雖然我沒試，但據說用料豐富，以紅豆、珍多條、百塔子再加入椰汁製成，入口冰冰涼涼，清甜解渴。至於我點的龍眼冰 ($32)，初頭還以為成品會用龍眼肉加入香滑椰汁打成，想不到原來是龍眼肉加上香茅，不過未知是否香茅味道過於霸道，喝起稍嫌苦澀，有點可惜。

餐前小食點了一客泰式蝦片 ($18)，喜歡它新鮮即炸，而且分量唔算好多，食落既香脆又不油膩，用來作為餐前小吃就最適合不過。

先來一碟金柚子蝦球沙律 ($98) 打開序幕，成品端上桌時，見分量頗大。細看材料，除了酸甜醒胃的泰國金柚粒外，仲有蝦米、乾蔥、炸蒜、辣椒、花生等，用料豐富，加上面頭淋上以十多款泰式香料煮成的汁，另配上大大隻鮮甜彈牙的海蝦，惹味好吃。

接著是一客炭燒豬頸肉 ($82)，原塊豬頸肉先以香茅及蜜糖醃至入味，再用中火煎至兩面金黃，取出切片。放上檯時，離遠已經聞到香氣撲鼻，挾起入口，豬頸肉厚身得來又夠軟腍，咬下充滿彈性，配上微辣醬汁，令人胃口大開。建議可加配一些較酸的醬汁，如桔仔汁、蘋果醋汁等，可中和油膩感。

由於人少，所以沒點小食拼盤，反而揀了一道泰式炸蝦餅 ($82)。碟蝦餅放上桌時， 見外層炸得焦香均勻，賣相討好，泰籍女店員更特別提醒，說吃時要小心燙嘴。急不及待挾了一件試試，果然熱辣香脆，而且入口彈牙鮮美，聽店員講，蝦餅是以鮮蝦打成蝦膠製作，絕對無加入麵粉等雜質，難怪吃起來蝦味十足，如果用來配香辣青瓜汁，相信食味會更佳。

友人想吃串燒，點了半打串燒沙嗲 ($82)，客人可於豬、牛、雞中任揀兩款，以迎合不同食客口味，做法夠貼心之餘亦夠彈性。由於先前已經點了炭燒豬頸肉，所以串燒就揀了雞、牛各三串。其實兩款串燒，水準都唔錯，雞肉串入口夠嫩滑、而牛肉串吃起來亦夠 Juicy，用來配沙嗲醬，香口惹味。

吃甜品前當然要加客菜蔬來平衡一吓，點了這味魚露炒雜菜 ($78)，雜菜用料非常豐富，包括有西蘭花、椰菜花、芥蘭、珍珠筍、芽菜、紹菜、菇菌、紅蘿蔔等，不過每款分量少少，而且味道好淡，完全沒帶魚露香氣，略嫌味寡，幸好不太油膩，就用作清清腸胃好了。

壓軸點了泰式甜品拼盤 ($88/10件)，一客 5 款，包括有椰汁千層糕、大菜糕、椰絲芝麻糯米糍、椰汁木薯、椰汁西米糕。幾款甜點，其實味道都唔錯，友人最愛就是椰絲糯米糍，貪其煙韌軟糯，配合面頭的果仁碎，濃香得來又富咬口。不過筆者這晚就對以木薯粉及粘米粉混合製成的椰汁千層糕，特別情有獨鍾，愛其椰汁味香甜又不過濃，食落煙煙韌韌，非常好吃。雖然朋友各有各忙，但難得相聚，而且大家無所不談，過了一個很愉快的晚上，很期待下次再聚。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================