十二樓的香茅

約了老公去希慎廣場為即將遠行的小妹子買禮物，不過由於要在公司趕埋份文件，所以來到時，已經是接近下午兩點鐘，提議大家不如先去吃午飯才 shopping。記得兩口子之前曾到訪過 12 樓一家越南餐廳，覺得食物水準都唔錯，決定番兜。點知原來店子已經結業，換上了這間取名「香茅」的泰式料理《Lemongrass》，餐廳裝潢看起來頗骨子企理，反正沒吃過，就一於試試。









除了幾張靠窗的梳化卡座外，店子的椅桌都是以木色為主，配上牆身的藝術彩繪、天花上的時尚玻璃吊燈、室內簡約的設計，柔和的色調，予人既年輕又清新之感。





入座後先翻開印刷得頗為精美的 Menu，食物選擇甚豐富，包括有頭盤、沙律、湯類、咖喱、即製印度薄餅、炒青菜、泰風味燒烤吧、廚師推介、飯類、粉麵、湯粉、泰撈起檬粉和甜品等，適合不同口味的食客。至於飲品方面，亦不遑多讓，單單以飲料一欄為例，竟然就已經佔據兩大版紙，由啤酒、礦泉水、汽水、咖啡或茶、能量飲料、泰國椰皇，以至無酒精特飲、雞尾酒特飲、健康乳酸和鮮果冰雪特飲等，樣樣有齊。



先每人點一杯飲品，揀了芒果冰雪特飲 ($40) 和椰子冰雪特飲，前者用上新鮮芒果炮製，入口清甜醒胃、而且甜味天然，屬健怡飲料，適合女生品嘗。也啜了一口老公點的椰子冰雪特飲 ($40)，雖然入口好冰涼解渴，但椰子味勁淡，要改善一吓。





老公愛吃海南雞，所以每次吃泰菜，例必點一客品嘗。原來這碟例牌的招牌海南雞 ($108)，分量都唔少，足有 1/4 隻。據服務員稱，店裡所選用的是黃油雞，以泰式做法，會加入香茅及薑等熬製。挾起一試，雞味唔算好濃郁、而且食落亦略欠油脂香，不過肉質嫩滑又不覺肥膩，以黑醬油和泰式辣醬伴吃，也算惹味。

由於碟海南雞是散點，所以沒跟上油飯，見餐牌有雞油飯 ($16) 供應，決定點一碗試試。向來不是飯桶，對吃雞油飯亦興趣不大，舀了少許一試，飯粒入口雖然是少了一股雞油香氣，但啖落煙韌得來又粒粒分明、富口感，水準都唔錯。


蒜蓉炒椰菜苗 ($82)，據說是泰國當地的家常菜之一，泰國入口的翠綠椰菜苗，以蒜蓉炒香，入口幾清甜，不過就略嫌食落有點韌、且鑊氣亦不足。



筆者向來愛吃香口之物，見這款泰啤脆炸蝦 ($78) 名字特別，正所謂「食隻蝦，笑哈哈」，決定點來一試。初頭還以為蝦隻入口會帶些少啤酒味，但原來只是以鮮蝦炸成的泰式炸蝦，而且外層炸漿食落有點厚，幸好包著的蝦肉味道鮮甜、加上啖啖肉，讓人吃得痛快，相信小朋友都會 like。

壓軸是姍姍來遲的馬來鬆餅 ($32)，即製的鬆餅，入口沒濃郁的牛油香氣，但餅邊非常香口、食落不油不膩，趁熱吃最滋味。





甜品點了這客熱吃的椰汁千層糕 ($38)，講真成品端上檯時，見顏色青 BB、色澤的確是有點嚇人，幸好千層糕入口軟糯煙韌，椰汁味又唔過濃，用來作這頓飯的結尾，亦算不錯。







剛才入來前，見門口餐牌的 Lunch Set，價錢公道，只是由 $62 起，而且選擇豐富，以銅鑼灣區來說，已算經濟；而且 12:45pm 前結帳離座，更可享八折優惠。臨走前見 reception counter 擺放咗一個超巨形的圓椎體印式薄餅做生招牌，多口一問，原來店員說這個其實是甜品，叫「馬來脆雪山」，吃時會嘗到入面沾滿椰絲、花生碎、煉奶、砂糖等，聽落幾吸引，下次有機會會試吓。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================