7 過了一晚愉快的小週末

近排與泰菜好像特別有緣，短短一個月內就已經吃過兩次，早前看食友博文，發現原來在尖沙咀開業剛好一年的《泰園》，於灣仔開了新分店。其實尖沙咀《泰園》筆者之前曾到訪過，覺得這間以泰式海鮮料理及清邁地道菜式作招徠的餐廳，食物水準不俗，而且風味正宗，所以趁這晚小週末，就一於拉老公來新店放肆一吓。

















店子位於 The Hennessy 3/F，地方雖然比尖沙咀店細一點，而且裝潢亦沒總店咁 cyber，但環境設計得簡約時尚，啡木牆身配以同色系的沙發座椅及餐桌、加上天花的羅傘型大吊燈、店裡的泰式擺設和對正大門的小型魚市場，配搭亦讓人感覺耳目一新。





入座後先細閱超巨形的大餐牌，食物種類繁多，由沙律、頭盤、刺身、肉類、燒烤，以至海鮮、湯類、蔬菜、粉/飯、甜品及飲品等，包羅萬有；而且仲有不少餐廳精選推介，如活魚海鮮刺身、獨家秘製的燒海鮮拼盤、泰式生醃蟹、泰式生醃蝦蛄、主廚推介的泰式古魚柚子沙律、芭堤雅芝士焗大頭蝦、泰園豆腐煲等等，一應俱全，選擇非常豐富。

還是先點飲品，讓老公慢慢研究，由我揸 Fit，點來了熱情菠蘿沙冰 ($48) 和香甜芒果沙冰 ($48) 各一。講真兩杯味道都非常之棒，前者濃香鮮甜、而後者亦冰凍兼透心涼，配上幼滑的沙冰，濃淡相宜，味道天然；不過賣相就唔多得，竟然用普通玻璃水杯盛載，呃唔到 like，未能惹來陣陣艷羡目光。





食物方面，先放上檯的蒜蓉炸軟殼蟹 ($148)，分量勁大，可惜入口味道過鹹，吃了一件已經即時收手。不過店員服務一流，見我沒再起筷，細心一問，知道唔合我口味，即時收走，還請廚師再為我重做。重新端上來的軟殼蟹，入口軟腍，雖然外皮仍稍嫌唔夠鬆脆，但配上蒜香和少少辛辣味，口感都算唔錯。





接著是鐵板蠔仔 ($118)，初頭還以為會好似鐵板餐咁，用個鐵板煎 pan 盛載，原來只是放在一個銀碟上，而且做法竟然是似台式蚵仔煎的泰式煎蠔仔蛋，睇嚟餐牌有需要加張相，以免食客誤會。幸好蠔仔粒勁飽滿，足有一蚊銀大，而且放上檯時仍熱辣辣、入口充滿鮮味，加上蛋邊夠脆，如果可以煎得再乾身一點就更正。





鱸魚食得多，但大多數都是以鹽燒或香煎煮法炮製，見餐牌有泰園香芒炸鱸魚 ($208)，決定點來一試。原條上檯的鱸魚，足有 8、9 吋長，而且最難得的是經過油炸後，內裡肉質仍然又香又滑，味道又鮮又甜，加上外皮炸得脆卜卜，入口完全沒有過重油味，配上面頭刨得幼細、微酸帶辣的青芒果絲，食味一流，真教人直豎母指叫好。

由於經常外出用膳，肉多菜少，所以當晚也加點了一味蔬菜來調節一吓。揀了這客蝦醬鮮魷炒通菜 ($98)，其實鮮魷一炒得過火就好易老，魷魚便會韌，但這個火候控制得不錯，加上通菜脆綠清爽、食落無渣，水準唔錯，可惜蝦醬味唔夠濃，稍欠惹味，不過整碟菜仍然兩下子就被老公「消滅」了。



記得上次去尖沙咀《泰園》吃過店裡的波波飯，入口帶雞油香，味道不俗，提議老公試試。握成圓球狀的雞油香飯 ($24/6粒)，不但賣相有趣、而且剛好是一碗飯的分量，加上一啖一個，食落粒粒分明，既不黏亦不糊，蘸上泰式酸辣醬吃，更是惹味。



甜品點了椰汁西米糕拼千層糕 ($48)，前者質感柔滑、椰汁味濃，入口冰凍；而後者就熱食，咬下煙煙韌韌，椰汁味香甜又唔過份，一冷吃、一熱食，口感非常特別。雖然這晚所點的菜式，不是樣樣都咁精彩，仍有改善空間，但整體來說，味道還算不錯，加上場內輕鬆清靜，坐得舒服，過了一個很愉快的晚上。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================