8 有 Heart 誠意小店

早前看了翡翠台飲食節目「區區開伙」，介紹銅鑼灣美食，當中有一 Part 提到記利佐治街的一間西式餐廳《HeSheEat》。其實這間人氣甜品店，筆者之前亦曾拜訪過，覺得店裡的出品，無論是鹹食或甜點，都頗有水準，既睇得又食得；反正已經有好一陣子沒來過，所以趁這天要去伊館聽 Talk，就順道和友人來吃頓午飯。







餐廳位於銅鑼灣地帶商場一角，記得上次到訪時，店子全場爆滿，食客絡繹不絕。所以為了避開午市人潮，我倆亦特意待至中午繁忙時間過後才到達，但沒想到雖然已經過了午市時間，店舖嘅入座率仍高達八成，可見餐廳人氣依然鼎盛。













安坐後，馬上翻閱餐牌，原來店子除了有小食、沙律、三文治、全日早午餐、意粉、意大利飯、甜品及飲品等供應外，午市還有三款 Set Lunch 可供選擇。由於友人對甜食興趣不大，所以決定只點一客甜品，另加一份小食和兩個主菜。



Starters 選擇唔算多，只得三款，包括有配上韓式辣醬的炸雞翼、配酸奶酪和泰式辣醬的炸粗薯條和這客伴以黑松露蛋黃醬的炸蘑菇釀雞肉 ($68)。混入了雞肉和 Parmesan Cheese 的蘑菇丸子，外形雖然略欠脹卜，賣相說不上吸引，但外層炸漿厚薄適中，入口鬆化香脆，加上內裡仍然保持水嫩，蘸點著黑松露蛋黃醬吃，食味倍添。





主食方面，先來一客焗龍蝦仔黑魚子牛角包配薯條及沙律 ($102)，牛角包好巨型，而旁邊的薯條亦非常之大堆頭。先撥開牛角包切口位的黑魚子細看，嘩，入面嘅龍蝦仔擠得滿一滿，分量絕不欺場，用料十足。立刻拿起咬下，牛角酥的包身雖然焗得唔算好脹好飽滿，但吃起來微暖香酥，而且入口非常鬆脆、帶牛油香，配以爽口彈牙的龍蝦肉和脆卜卜的黑魚子一起吃，既滋味又滿足。

輪到伴吃的薯條，望落去雖然稍欠粗身，但炸得色澤金黃，而且每條都外脆內軟，薯味十足，沾上剛才混入了黑松露蓉的自家製蛋黃醬吃，入口散發陣陣黑松露幽香，令人食到停不了口。



至於另一客主食就點了春雞黑松露意大利飯 ($128)，原來成品賣相亦絕不輸蝕，而且廚師非常細心，已經將雞隻分成兩件，方便食客享用。先切開雞脾肉一試，肉質好嫩滑，連友人揀的雞胸肉也不覺嚡口，加上雞皮夠薄又無油膩感，實在值得一讚，配埋下面煮得煙韌的黑松露意大利飯，吃起來夠曬厚滑濃香。



甜品點了這客檸檬忌廉班戟卷 ($58)，據店員稱，班戟和檸檬忌廉都是廚師每日新鮮炮製嘅。先切開件 Crêpe Roll 一試，蛋味好香濃，而且入面仲放咗微酸微甜的檸檬醬，加上味道不太甜嘅自家製乳酪雪葩，很適合悠閒的夏日午後品嘗。唯一可惜就是伴吃的蜜糖脆脆，既硬實又黏牙，否則食味更佳。



飲品方面，友人點了朱古力曲奇咖啡沙冰 ($42) ，而筆者就揀咗杯芒果熱情果沙冰 ($42)。友人很慷慨，讓我先試一啖，咖啡味好濃，而且質感好滑溜，不過就稍嫌面頭的朱古力曲奇泡沫有點膩口；反而我揀的芒果熱情果沙冰，不但賣相搶眼，而且果味醇厚，喝罷令人冰涼透心，最用來夏天消暑！雖然店裡的食物，選擇唔算好豐富，但由鹹食以至甜品，都依然保持倒水準，而且用餐後，店員會走過來聽取客人對食物的意見，很有誠意，唔怪得可以 Keep 住咁旺場啦！

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================