8 寫意晚餐@小甜谷

姨甥仔就快要出發去澳洲遊學了，雖然很替他高興，但心情難免有點不捨，所以這晚就相約他一起來銅鑼灣吃頓晚飯。選了這間離港鐵站只是 2 分鐘路程的《小甜谷》，因為餐廳除了有甜品供應外，還有加入了西餐元素的午餐和晚餐，亦有意粉和漢堡包等輕食，很適合年輕人口味。









餐廳以白色為主調，裝潢骨子企理，一踏進店，便會見到近門口位置的半開放式廚房和水吧，配上旁邊一大幅充滿童趣的牆上壁畫和用餐區的一排全落地大玻璃，風格清新，令人有置身外國的悠閒感覺。







安座後，獲店員告知，原來用餐時間只有 90 分鐘，那就事不宜遲，立即點飲品。姨甥是個 chocolate lover，揀了杯冰凍的特濃朱古力 ($39)，筆者雖然沒試，但據說杯飲品不但質感滑溜、巧克力味亦非常豐盈，加上入口凍冰冰，用來解暑一流！而筆者就揀咗杯賣相精緻悅目的黃果樂 ($45)。先啜一口，味道略淡，芒果味唔算突出，而且還有點微酸，反而啖落會嘗到陣陣菠蘿的甜香。拿起餐牌細看，原來成品是以香芒、鳳梨和蜂蜜乳酪等炮製，配上面頭的果仁碎粒和杯身入面的奇異果片，入口酸酸甜甜，充滿清新的果香。





主食方面，每人各自選一款，筆者揀了黑松露野菌燒雞焗墨魚汁珍珠飯 ($108)，成品端上桌時，見飯粒面頭鋪滿焗至色澤金黃的黑松露芝士，加上內裡醬汁的熱力將黑松露的香氣帶出，香味著實誘人。馬上撥開面層的芝士，先嘗一口墨魚汁珍珠飯，米飯的熟度剛好，咬下去有彈性，而且食落帶墨魚汁的鮮香，連一丁點兒腥味也沒有，實在值得一讚！試埋燒雞，雞皮烤得頗脆口，雞肉嫩滑 Juicy，配合薄薄的黑松露芝士、珍珠飯和野菌等一齊吃，每一啖都有多重口感。





至於姨甥仔就揀了一客韓式醬燒咖喱蜜糖 BB 豬仔肋骨配手製薯條 ($128/全份、$68/半份)，初頭還以為這小伙子只係點咗 half ribs，想不到他竟然咁食力無限，揀了全份上，還說若吃不完的話，就由佢一力承擔，果真後生可畏。講真，豬肋骨就食得多，但以韓式醃肉醬再混和咖喱蜜糖汁來炮製豬仔骨，這趟還是首次品嘗。豬仔骨端上桌時，見 size 頗巨形，足有兩大塊，而且每件都有五支骨，分量絕不欺場。立即切開一試，火候拿揑得剛好，雖然連著肋骨的肉唔算多，不過輕輕一撕，肉便即時分離；而且味道微辛得來又帶點蜜糖的甜香，加上肉質柔軟彈牙、既 Juicy 又嫩滑，配埋旁邊的幼身薯條吃，香口惹味，正！







既然店子以甜品起家，一場來到，當然唔可以錯過啦！所以吃完主菜後，又各自點了一客甜品。姨甥仔是朱古力粉絲，剛剛才喝過朱古力凍飲，竟然還意猶未盡，連甜品都揀咗客朱古力心太軟 ($58)，果然是朱古力狂熱分子。心太軟即叫即焗，做得好有水準，切下去時，裡面溫熱的朱古力漿即時流出，而且入口朱古力味非常香濃，甜而不膩，實在值得一讚！







至於我點的梳乎窩夫配雪糕 ($68)，原來成品是用咗坊間少見的梳乎厘做法來焗製窩夫，蛋白的鬆軟加上蛋黃的香濃幼滑，令窩夫有外脆內軟的厚厚質感，食味的確不俗。吃時記得要淋上甜而不膩的蜂蜜，再配埋香滑的雲呢嗱雪糕吃，會更加滋味。姨甥仔，下次一於等你返嚟再食過！

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================