8 無敵海景 Semi-Buffet Lunch

從沒到訪過荃灣汀蘭居，只知這裡是服務式住宅，而且聽說環境背山面海、景致不俗。早前瀏覽食評網時，發現汀蘭居入面的餐廳《Anchor’s Seafood and Beer House》，原來都同樣坐擁無敵海景，而且更有自助早餐、半自助午餐、自助早午餐及海鮮自助晚餐等提供，見 Semi-Buffet Lunch 定價合理，所以就揀了個週末，兩口子來一試。











初頭還以為餐廳位處油柑頭，地點非常隔涉，沒想到原來由荃灣港鐵站搭 96M，不用 10 分鐘就已經到達，對我這個港島人來說，交通尚算方便。由於來到時，時間尚早，所以兩口子決定先到室外逛逛。嘩！這裡的景觀果然一流，不但景致迷人，而且更令人有遠離煩囂、置身於大自然的清新感覺。



終於夠鐘開餐，先介紹一吓這裡的星期六半自助午餐收費，定價由  $168-$288 不等，視乎所選的主菜而定，另外客人可於自助吧檯上，無限任吃沙律、小食及甜品。







至於餐廳環境方面，除了剛才提過的室外露台位之外，用餐區入面其實地方亦頗為寬敞闊落，而且配有偌大的玻璃窗，讓陽光恣意揮灑進來，安坐其中，令人感覺特別開揚舒爽。















吃主菜前，先外出巡一轉吧檯，食物款式雖然唔算好豐富，但其實選擇也不少。除了有大大盤嘅沙律菜和多款配料之外，另外還有薯仔沙律、南瓜沙律、通粉和印式炒飯、烤野菜、番茄水牛芝士、凍肉、煙三文魚、壽司、冷麵和麻醬豆腐等。



先動手 DIY 自製沙律，配料選擇都幾多，有紅腰豆、雞心豆、紅菜頭、青瓜、粟米、雅枝竹、提子、紫洋蔥、杏脯、麵包粒等，而且全部食材都好新鮮，食味不俗。至於其他頭盤方面，比較喜愛的有通粉和薯仔沙律，前者通粉沒煮得過腍、味道幾香濃；而後者薯仔沙律，由於混入了蛋黃醬，所以口感亦頗滑。

壽司和凍肉，水準一般，反而推介一試蟹籽麻醬豆腐。豆腐幾滑溜，而且帶濃郁芝麻香，加上面頭蟹籽的粒粒口感，味道唔錯。











由於要留肚的關係，所以沒喝南瓜忌廉湯，但據說這湯很香滑，而且忌廉味濃。至於幾款火腿方面，是日就有西班牙辣肉腸、巴馬火腿和莎樂美腸。三款之中，個人就比喜愛鹹香誘人的 Parma Ham，可惜沒配上甜美的蜜瓜，否則食味更佳。如果愛吃芝士的話，其實這裡亦有兩款可供選擇。





接著輪到吃主菜，共有 5 款選擇，先來的 Fettuccine with Lobster ($288)，成品用上半隻龍蝦炮製，分量十足，而且雖然只是簡單香烤而成，但卻食得到龍蝦的鮮味與爽彈口感，配寬條麵來吃，是飽肚又豐富之選。



至於我點的 Cod Saltimbocca, crispy polenta, portobello, confit tomato, beetroot puree ($238)，鱈魚沒有過份調味，魚肉好嫩滑，入口富魚油香，而上面蓋著的火腿亦烤得非常香脆，唯一可惜就是過鹹，幸好墊底的大啡菇，夠曬厚肉多汁，配上微甜的紅菜頭醬汁，既惹味又好吃。























甜品方面，話多唔多，但話少其實亦不太少，除了有可以配朱古力醬吃的泡芙、棉花糖、手指餅外，其他款式仲有藍莓芝士蛋糕、焦糖燉蛋、拖肥撻、檸檬蛋糕、朱古力慕絲、麵包布甸等，若每款都吃少許的話，已經很豐富。另外近水吧位就擺放咗一部自助型式的班戟機，客人只需按 OK 鍵，便可以吃到新鮮即製 Pancake。當然唔可以錯過的，還有旁邊的 Dreyer’s 雪糕。



飲品方面，選擇不多，只有咖啡或茶，不過加上清甜水果作結，很不錯。講真，這頓午餐吃得既輕鬆又滿足，讓我倆都踏著愉快心情歸家。

================================

感謝mjqueen7e提供以上資料

mjqueen7e的網誌: http://www.openrice.com/zh/gourmet/reviews.htm?userid=66478&city=hongkong

================================