4月尾時知道香港會開海外第一間嘅Café ＆ Meal MUJI 之後，已經同男友講好咗要去一次。
11/6正式開業，我哋前晚13/6我哋就去試。
對於我哋2個嚟講，好少會咁趁熱鬧去試新嘢，今次真係少之又少嘅一次。
未開業前去MUJI已經見到宣傳單張，大概知道係個模式係點、有啲咩食。
基本上係睇揀3品料理定4品料理，再配飯＋嘢飲為之一set，另外仲有甜品set。
叫得做cafe都預咗要搭枱同自己搵位。
去到見到安排咗排隊嘅位，亦有職員同我哋安排入座。
等咗10分鐘左右就到我哋，唔算話等得太耐。
因為係自助形式，出去叫嘢食叫嘢食再自己拎返埋位。
當排到我哋有位時，職員俾咗2個｢留座｣嘅牌我哋，我哋可以直接去排隊買嘢食。
呢個係同日本嘅Café ＆ Meal MUJI做法一樣。
同埋有樣嘢值得讚嘅就係，櫈下面有個籃俾人擺嘢。
令我諗返幾年前去Afternoon TEAROOM都有同一個安排。
我係嗰啲寧願迫都唔會擺自己個袋落地下嘅人，所以有個呢啲籃好緊要。
夏天還好，冬天又褸又袋，真係要位嚟擺嘢。嗰陣已經話，若果香港都有呢個做法就好啦。
加上成間cafe地方唔大，啲位安排得幾逼下，一人一個袋都唔知擺邊好。
我哋一人一個四品料理，配十穀米同紅茶／烏龍茶。$196/2人
個人認為一啲都唔平，但點都要試吓，支持吓。
叫嘢食時個流程我覺得有啲混亂。
每個人叫嘅嘢食組合都有唔同，叫一份餐除咗收錢嗰位職員之外，中間有4-5個人問你相同嘅問題：小姐你叫嘅係3品定4品？／飲咩？／要咩飯？
揀好晒食咩都好，埋到去收銀都仲係會問題相關嘅問題，將件事簡單複雜化咗。
其實一個staff完全去serve晒成個set嘅嘢直到去收銀度，應該係會比而家流程中會經過一個staff都被問問重覆嘅問題快得多。
而且最大嘅一個問題係，嘢食！
當我哋排隊時已經發現咗一個問題：嘢食選擇好少，而且係COLD DELI同HOT DELI嘅比例係7:3。
排後面嘅有人排排吓都走咗，因為見到無咩嘢食好揀。
我哋排隊買嘢食都等咗5分鐘有多，但其間無見過佢refill賣晒嘅嘢食。
問staff｢黑醋醬豚肉｣同｢甜椒醬炸雞｣會唔會refill，職員話要等多10分鐘先會有，咁我哋覺得OK，所以第二份都照叫4品。
嗰陣係8點半左右，10點先係last order，食物準備得真係太少。
後面有好多都係等好似我哋咁，等｢黑醋醬豚肉｣同｢甜椒醬炸雞｣，始終熱食選擇太少啦，個櫃望埋去得一堆草，全部都係沙律嚟。
食咗10分鐘，其實絕對可以食晒成個set，｢豚肉｣終於都有啦，一心諗住個炸雞都唔會太耐啫，成程飯我拖到好慢咁食。
期間追咗一次個炸雞，職員話要等多10分鐘，再過多5分鐘隔離枱又係同樣因為已經食晒成個餐，所以又去追個炸雞。
同一個職員同一個答案，要等多10分鐘。
前前後後等咗半個鐘，最後我哋再追問，結果答案都係一樣。
我哋要求取消個炸雞，職員都好有禮貌咁同我哋去跟進。
拎返我哋張單去void時，職員話因為要我哋等咗咁耐唔好意思，叫我哋揀返個甜品，食住等。
我哋叫咗抹茶雪糕，但食完張單都未見影。
最後我哋去問返cashier，好在佢都記得差$10未俾返我哋。
由開始買嘢食嘅時候已經發現咗成間cafe有好多問題。
成個買嘢食流程有問題、晚飯時候已經無嘢食俾人揀，嗰刻我真係諗：係咪已經好晏！？
見到一啲人淨係叫個布甸都喺位等咗十幾分鐘先有，真係等得好苦。
最重要嘅係，我個腸胃話我知啲嘢食唔乾淨，因為我食完又肚痾啦！
未食個豚肉之前我已經開始有啲肚痛，初頭我都諗住係少事，但最終都係肚痾收場。
staff全部都態度好好，明知我叫佢埋嚟都係問個｢炸雞｣仲要等幾耐，但佢全程都好好笑容。
我呢個MUJI fans見到間Cafe咁，呢刻完全無想再去食嘅念頭，戥佢好慘。
希望佢可以好快咁改善到，他朝一日我會再去食啦。
============================================
感謝 tabitachi 提供以上資料
tabitachi的網誌: http://tabitachi.wordpress.com/
============================================
累積瀏覽 123395
全部攻略 271
全部回應 5
Café&Meal MUJI (銅鑼灣店)
Yukkuri
Nomad
Italian Tomato Café (馬鞍山店)
Express Bar by Lassana (觀點中心)
Espresso Alchemy (美麗華商場)
CoHee Studio
Espresso Alchemy (海港城)