救星

每次去日本有一個地方去、有樣嘢係必買嘅－去藥房買藥。

屋企個藥箱除咗睇醫生時食剩用嚟看門口嘅藥之外，幾乎全部都係日本藥嚟。
由咳水、喉嚨痛藥、感冒藥、止痛藥，通通都係日本藥嚟。

無去日本就嚟有3年，當時買落嘅存貨都差不多用晒。
期間只要聽到有人會去日本旅行的話，都會搭單問句：｢可唔可以幫我買藥？｣

其實呢3年，好多日本藥香港都有得賣，例如咳水同埋喉嚨藥。
但最最最最緊要嘅止痛藥始終未有……

止痛藥簡直係我嘅必需品嚟。
因為我每個月都要食佢，誇張起上嚟，一個月我可以食咗一排（10粒）。

試過睇專科醫生，醫生都係話唯一解決方法係食止痛消炎藥。
醫生可以開得俾我嘅我都試過。
內裡份量、成份雖然唔清楚，淨係知道前前後後可能要食足5日先會達到我｢唔痛｣嘅效果。

而且我要食到3日後先至覺得痛少咗，即係我食頭2日藥時我都係繼！續！痛！！！

曾經有一位醫生仲話：｢既然你搵到隻藥食咗OK嘅咪就食嗰隻藥囉！邊隻OK就係邊隻啱架喇！｣
聽完呢個答案嘅我真心有諗過：｢咁點解我要嚟睇專科？！｣

最後一次覆診時醫生已經話除咗食荷爾蒙藥之外已經無嘢可以試。
當時醫生有開到藥俾我試，叫我3個月後返去覆診嘅。
但經過咗1年有多嘅覆診生涯，最後我決定close file！

最近有朋友去日本，於是我又上網搵圖俾yen朋友叫佢幫我買藥。
一搵先知原來食開嗰款LUNA（粉紅色）已經停產無出，用新藥Luna i取代。

2003時我係食BufferinA（一般止痛藥）先，到後來2006年出咗LUNA呢隻就轉投食呢隻藥。
係佢先至救到我。
到而家2012年轉新款，雖然仲未食過新藥嘅效果，但上網睇過評語都係話比以前嘅配方好，所以托朋友大手同我入定貨，以防唔知等到幾時先有人可以同我去買。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================