小南國

朋友生日，主角同我一樣愛食上海嘢，所以今個月又可以去食吓上海嘢啦。

小南國應該好多好多年前係曾紅食過，記憶中唔太吸引我，亦無咩印象食過啲乜。
所以我完全當試新嘢咁去食～

雞絲粉皮
呢個雞絲粉皮我唔太知價錢，因為我無咩點睇過個餐牌。
但我覺得有啲呃秤嘅感覺，因為粉皮下係有堆沙律菜。
初頭擺低碟嘢，大家影相時都覺得：啲嘢都幾大碟噃。
點知一夾就知｢被騙｣，不過我哋全枱都係女仔，影響不大。

個醬汁平時唔係花生就係麻醬。
若果食到係花生的話我係會放低筷子唔食，但呢個，我食嚟食去都覺得又似花生但個味道唔搶，未至於令到我唔食，但又覺得係有麻醬喺入面，好迷惘。
但我肯定嘅係，佢個醬係撈咗肉汁/湯落去，因為有陣鮮味。

美中不足嘅係啲粉皮我覺得切得太粗，我估啲粉皮係有1.5cm咁闊。

勝瓜炒什菌
啲勝瓜炒得幾好食，但全碟嘢都真係幾油吓。
油到啲菇都吸唔晒，同埋食完覺得口渴。
又油又渴，我成晚自己飲咗一壺普洱。

蟹粉小籠包
平時我好少嗌有蟹粉嘅小籠包，因為多數都唔好食嘅，多數我都只會叫鮮肉嘅小籠包。
呢個唔係唔好食，只不過我食唔出有蟹粉，我估真係只得面頭嗰一小點蟹粉咁大把。

皮都幾薄，要好少少筷子功先夾得到，呢籠入面有1/3都係一夾就流晒嘅湯出嚟，嘥咗。

干煸四季豆
呢個係全晚最好味嘅其中一樣。
因為我哋有人唔食得辣，所以叫咗小辣，但都依然好惹味。
若果係正常嘅辣度的話，一定會更加惹味。

炒年糕
另一樣全晚最好味嘅就係呢個炒年糕。
年糕煮到好腍好入味，完全無食到｢粉｣嘅味道。
唯一唔好嘅又係太油。

上海菜炒飯
的確係乾身但油，唔好炒飯嘅我食咗一羹就無再食。

八寶鴨
講咗全晚最好食，講吓全晚最難食。
就係呢隻八寶鴨！

第一啲糯米煮過龍，雖然我無食過八寶鴨，但我同朋友們都一致覺得啲糯米唔應該煮到咁，
黏到就嚟變咗麻糬咁一pat嘢。
第二就係個汁，太濃太杰太咸。

糯米我唔夠膽食，加上唔吸引。
我只係食咗圍邊嘅菜同埋2隻翼，但真係覺咸。
朋友佢哋有食個鴨身，評語係啲肉覺鞋同老。
但眼見隻鴨呢個size，相信佢都係俾人煮過龍所以搞成咁。
而佢亦都成為呢晚唯一無俾人食晒嘅一碟餸。

特色松子魚
呢個魚我覺得都算唔錯，個味食落都幾好味。
我平時係唔食呢啲酸甜汁，但我都有食到。
但最唔好就係陣白醋味好勁，碟魚喺我前面我覺得好攻鼻。

整體嚟講呢晚嘅嘢食係油同咸。
上海嘢比較濃味的話可以理解，但油到咁真係不太接受。
我明明喺樓下係飲完杯cappuccino就跟手上去食飯，但我一個人都可以飲晒成壺普洱，可想而之係有幾誇張。

生日蛋糕
食飽飯我哋就有生日蛋糕食啦。

美心呢個蛋糕唔錯，好多生果仲要係大大件，而且cream算係少，個蛋糕質地好細密真係好海綿。
啱晒主角好鍾意食生果唔鍾意cream呀。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================