今日の晩ご飯

• 上湯粉絲西洋菜
• 碎肉蒸水蛋
• 蒸鏞記潤腸

男友返早嘅日子，就係好好補給｢菜｣嘅時候，特別係第一日早，今日都唔例外。

半斤西洋菜一次過煮晒，成餐餸煮得唔耐，洗菜洗得我最多時間，不過無咩所謂，出街我哋係唔會食西洋菜嘅，自己唔整就無得食架喇。無論洗嘅時候、食嘅時候我同我男友兩個都唔覺得係半斤西洋菜咁少，又可能因為洗菜時我洗到好似驗屍咁喇。為咗加大個volume，於是我整多包粉絲落去。天氣太凍，我真係想食好多嘢落肚，但係夜晚開飯時間早極都要21:30，過多無3個鐘就要去瞓覺，索性我諗住用菜、粉絲加啖湯，令到自己又包又暖。

水蛋我想食好耐。本來諗住兩色蛋嘅，後尾喺雪櫃見到有半份豬肉，於是拎咗出嚟醃味加埋落蒸蛋度。若果唔加，今晚又係無肉食～哈哈哈。

 煮飯途中收到男友個whatsapp話佢肚餓，於是咗兩諗，橫掂今晚個煲（滾菜用）上面就係蒸蛋，唔差在蒸好蛋之後蒸多樣。於是決定喺雪櫃拎孖｢鎮｣櫃之寶出嚟－鏞記潤腸出嚟蒸咗佢。男友見到佢嘅出現覺得好意外～仲即刻話不如整煲仔飯！！其實我有諗過，只不過唔知面頭落咩料好。

我哋兩個都好鍾意食潤腸，亦只食潤腸，其實呢孖係啱啱夠我哋一人分一條去食。但最後我哋因為免得要食太多飯，所以兩個最後夾埋都係食咗一條咋。

今晚繼續食佢！

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================