猫の手作りご飯

到底食咗啲咩食到舐舐脷呢？
仲有點解個鼻哥黃咗一點嘅？

10月尾時開始咗俾hime食Orijen以外嘅嘢。
因每兩個禮拜先會有一次，所以選擇自家製而唔買罐頭。

自己整包保新鮮、乾淨。
因為啲材料本身就係我哋嘅食材嚟，唔洗特別另外買。
做法只需要整碎、唔洗任何調味、蒸熟即可。

第一次係清蒸雞胸肉。
蒸完一打開蓋hime就已經追住我。
對於我哋嚟講嘅「腥」正正就係hime覺得嘅甜。

第二次見雪櫃有南瓜，於是又加啲南瓜蓉。
將啲雞蒸嘅汁＋水，變成南瓜雞肉湯。

每次hime都係先飲晒啲湯，再慢慢食啲雞肉。

呢個囡其中一個優點就係：
嗰樣嘢食幾好味、幾鍾意食都好，都唔會話一次過要食晒為止。
都識得行開兜幾個圈先返嚟再食過。

跌落咗地嘅一粒仔都唔能夠放過。
新鮮雞肉噃，就算攝咗落盤底唔洗篤住都會即刻摷返出嚟食呀！

見佢食到嗒嗒聲，好鬼滋味。

食到咁上吓，開始無聊啦！
又用手嚟攞嘢食。

挪威貓嘅壞習慣，無論飲水食嘢都好鍾意用手同擔出碗外食。
呢兩個壞習慣好難改⋯⋯

差啲同我碗都洗埋。

鼻哥嗰點南瓜，洗面洗咗成個字都未抹唔走，最後我出手同佢抹咗佢。

頭一次食雞肉時，我一收碗hime就跟我入廚房。
好似個貼身保鏢咁，我去邊佢去邊。
希望有得refill、繼續有得食。
但等完又等都無，唯有死死氣去食返乾糧。

到第二次食完雞肉之後，又係喺廚房門口等。
希望有奇蹟出現⋯⋯

到第三次嘅時候，呢個囡心明係唔會有奇蹟！
呢頭食完晒會雞肉，見未夠，擰過去右邊跟手食枱面啲乾糧。

呢樣都係呢個囡另一個優點。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================