傳聞

初初養hime時好多嘢都唔識，就不停睇書上網睇資料。
習慣咗之後都好少再上網或者討論區嗰啲睇嘢。

早幾個禮拜前手痕走去噤吓啲討論區嚟睇，一開就見到又話hime食開嗰隻貓糧又斷貨。
仲話今年內都會不停斷貨，下年再無代理會做呢隻糧，紛紛提醒大家好開始搵定糧嚟轉。

呢隻糧斷貨都唔係今日嘅事。
即刻打去平時訂開糧嗰間問話無，petshop又話無，有啲仲叫我好轉定邊隻邊隻糧，轉咗就唔洗成日斷貨撲糧。

其實除咗買第一包糧係話買就買到之外，之後每一包都係斷貨期間撲返嚟或者貯返嚟嘅。
而家hime食緊嘅都係上年年尾時貯起嗰12kg嘅糧嚟，到而家食到仲剩返3kg左右。

又再嘗試上網搵一輪資料睇吓有無邊隻糧可以同返而家呢隻差唔多。
結果都係一樣，始終覺得而家食緊呢隻係最好。
加上之前vet問hime食邊隻糧時都無話食呢隻有咩問題。

轉糧我真係唔想，之前曾經無雞肉味試過買咗包魚味俾佢食佢又唔多鍾意。
難得一隻好嘅糧佢食得開心我哋又開心嘅……

諗諗吓，最後我打去問埋香港嘅代理。

代理話我知呢大半年不停斷貨嘅原因係加拿大嗰邊個廠房火燭，搞到成個生產線都出貨少咗，而唔係佢哋無訂貨。亦都唔會唔代理呢個牌子嘅糧，強調：｢我哋唔會唔做｣。絕對唔係網上傳聞所講話出年唔再代理呢個牌子。

求證完之後放心晒，我要做嘅係貯一定份量嘅糧就可以，唔洗考慮同hime轉糧。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================