蘿蔔糕實驗

第一底小露寶蘿蔔糕終於都誕生喇！

賀年食品當中，我同男友都一樣，最愛同只愛嘅就係蘿蔔糕，其他乜糕乜糕我都係唔鍾意食。
好自然就覺得我係會整蘿蔔糕。
但其實我係曾經咬牙切齒、大大聲聲講過話係唔會整寧願出去買。
原因好簡單，諗起要蒸糕嘅煤氣費就驚，所以我係唔會整。
上個禮拜喺一個Blog度發現麵包機可以整蘿蔔糕！！竟然有人做過實驗，當然我又膽粗粗不妨一試喇～
滿心歡喜點知出嚟效果未如理想，唔係唔食得，但各方面都唔多似係蘿蔔糕。
男友試過之後覺得味道係似，可以再試吓去改善問題，而且成本唔貴。相比起聖誕都未到就叫男友留意定公司嗰啲promo買蘿蔔糕嘅價錢，一底要成$82，我的確今年再買唔落手。計埋煤氣，材料費，加上無味精，無防腐劑呢啲無得計嘅情況吓，男友話絕對值得自己去整。

一個禮拜過去，諗住要整，要實驗，不如用返一個傳統啲嘅方法去整。

屋企蒸嘢方法得一個：蒸架！
但個蒸架一啲都唔大，要搵個高身得嚟又細嘅器皿擺落去蒸的話，我只諗到—蛋糕模！
再諗諗吓……唔係喎！度一度……小露寶（真空煲），夠位放個模入去喎。

就係咁！
今次呢個實驗係用咗傳統方法+蛋糕模+真空煲去蒸糕BELL。

隔水煲滾（蒸）10分鐘，之後放入真空煲又1個鐘，拎返出嚟又煲多佢10分鐘（留意煲底仲有無水），再掉返佢入真空煲焗多佢半個鐘。用竹籤或者筷子篤吓中間，無嘢痴住為之熟透。撻凍就可以甩模～

就係咁，小露寶蘿蔔糕就完成咗喇。
時間係耐咗啲，但慳返唔少煤氣，若果唔係全程大火蒸熟佢，又一屋蒸氣，真係咪搞。

越嚟越覺得有小露寶好好，又慳錢，又安全，仲可以整到我至愛嘅蘿蔔糕。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================