香煎鹽麴雞肉便當（附食譜）

2012.09.26　塩麹のチキンソテー弁当

• 香煎鹽麴雞肉
• 韮菜芝士泡菜蛋卷
• 金平牛蒡

唔知大家有無聽過鹽麴呢樣嘢呢？
鹽麴係鹽＋米麴＋水發酵、熟成而成嘅調味料嚟，近呢一年喺日本好流行。
但其實呢種調味料並唔係啲乜嘢新嘢嚟，而係其中一種最古老嘅傳統調味料。
老一輩嘅好多都會自己整，就好似味噌咁，係屋企常用嘅調味料。

鹽麴之所以會喺日本｢再次｣大熱，據說係因為鹽麴可以令食物有｢醍醐味(隠し味)｣嘅功效，若果用佢嚟醃製過嘅食物會更加鮮甜。鹽麴含有豐富嘅維他命同乳酸菌，有整腸作用、美肌效果，仲有防止老化嘅功效。咁受到重視嘅健康食材，市面自然就多咗好多現成商品可以買到。亦因為咁，我終於有機會試到呢種調味料喇。

今次第一次用嚟煮餸，我賞試咗最簡單嘅做法－醃雞胸肉。
對於整雞胸肉我有｢障礙｣架，因為我好怕雞胸肉鞋口。
只要煮得過咗火候，就會變鞋，但唔煮返咁上下咩，又唔熟。

今次用鹽麴嚟醃，再煎香，完全無鞋口之餘，食落仲要係juicy同鮮甜架。
我呢塊都係急凍嘅雞胸肉，竟然食到甜呀！
令我呢個唔太愛食雞胸嘅都覺得可以就咁食呢個雞胸肉嚟餸成盒飯。
不過男友建議下次可以加返啲黑椒，等佢再香口啲，我下次會試下！

香煎鹽麴雞肉 （2人份量）

• 雞胸肉　1件（200g）
• 鹽麴　1湯匙（20g, 肉嘅10%）
• 橄欖油　1茶匙

1. 將雞胸肉切件，抹乾水份後放入膠袋，用鹽麴醃3小時或過夜都可以。
2. 熱咗個鑊加橄欖油，用中火將雞胸肉一邊煎至轉色後再翻轉煎埋第二邊，冚蓋煮多5分鐘。

＊用鹽麴醃過嘅肉會比較易燶，所以唔好用太猛火去煎。煎之前略略抹走鹽麴都可以減低煎燶嘅問題，不過今次我無咁樣做到都OK，鑊都無話難洗。
＊若果屋企無易潔鑊的話，可以選擇喺鑊上面鋪張焗爐紙先再煎，可以避免咗痴鑊又難洗嘅問題。

韮菜芝士泡菜蛋卷

• 雞蛋　2隻
• 泡菜（切粒）　1湯匙
• 韮菜（切粒）　少許
• 芝士（切粒）　半片

1. 所以有材料撈勻。
2. 燒熱蛋卷煎pan加油後將1/4份量嘅①倒入，當蛋半熟嘅時候就將蛋捲起嚟。
3. 將蛋卷移到去較遠自已嘅位置，响近自己嗰邊（較近把手嘅嗰邊）加少少油再倒入1/4嘅份量。重覆②、③嘅動作至完成。

金平牛蒡 （2人份量）

• 牛蒡（削絲）　1/2條
• 紅蘿蔔（切幼絲）　中1/2條
• A
  |　日本豉油　0.5湯匙
  |　味醂　0.5湯匙
  |　三溫糖/砂糖　1茶匙
  |　唐辛子（切細圈）　半條
• 麻油　2茶匙

1. 牛蒡要浸醋水15分鐘，再搵水沖淨後隔水。
2. 燒熱麻油後將牛蒡同紅蘿蔔炒至半透明，轉軟身之後將A加埋落去再炒勻。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================