釘煮玉筋魚（附食譜）

2014.08.23 イカナゴ釘煮

每逢春天開始，神戶一帶嘅每家每戶就會開始整呢個郷土料理－釘煮玉筋魚。
之所以叫做釘煮，其實係啲玉筋魚煮好之後就好似生鏽嘅釘一樣。

釘煮係佃煮嘅一種，主要材料係豉油、味醂同糖。
味道甜甜哋帶鹹，送飯一流。
而且煮嘅過程係將調味料煮至收汁，大部份嘅水份煮揮發晒，唔易變壞。
保存得好嘅話，呢個餸係可以擺雪櫃擺足1年嘅常備菜。

新鮮嘅玉筋魚撈起後一日之內就要煮，如果唔係就會變壞。
所以喺香港搵到嘅都係煮熟咗再經過曬乾嘅乾貨嚟。

玉筋魚仲有一個好得意嘅名。
有次行過和風惣菜部時見到一盒盒嘅魚乾仔，其中一款就係叫「小女子」。
見$20一盒仔於是買咗盒嚟試，試完發覺唔錯，而且男友都鍾意食。
於是又上網睇到底係點煮啦，一查先知原來一直認識嘅玉筋魚另一個名叫做小女子。
見到香港有乾貨嘅玉筋魚賣，呢度一籃都係$38，可以分到煮兩次 。
因為係乾貨，所以做法同時間都比整新鮮嘅簡單同快好多。

釘煮玉筋魚

• 乾玉筋魚　50g
• 三溫糖、日本豉油、味醂　各1湯匙
• 熱水　適量
• 油　1茶匙

1. 用熱水先沖一沖乾玉筋魚去多餘嘅鹽份，隔走多餘水份；調味料先攪勻。
2. 將玉筋魚加入易潔鑊，用慢火炒到水份揮發後，加油炒勻。
3. 最後加埋糖、豉油同味醂落鑊，其間不停撈勻至完全收汁就完成。

收汁後將釘煮玉筋魚鋪開，等熱氣盡快散走，保持乾身。
攤凍期間可隨個人喜歡加埋白芝麻一齊撈勻。

呢個份量一次可以整到3杯WECK仔(80ml)。
未食住嘅拎去做真空，等佢keep得更加好。

有咗佢，做飯素、整飯團又得，當個餸做弁当一流。
而且啱晒咖啡人，可以補返啲鈣。
如果食合桃的話，可以減走10g玉筋魚，改落15g合桃肉落去。
不過我完全唔食nuts，所以屋企無出現過呢個組合。

============================================

感謝 tabitachi 提供以上資料

tabitachi的網誌: http://tabitachi.wordpress.com/

============================================