繼拉麵熱潮後，發現原來近日沾麵專門店亦愈開愈多。筆者早幾天午飯時，才剛和公司同事搭叮叮去咗蜆殼街一家沾麵專門店，品嚐那裡獨沽一味的沾麵，這晚又應友人邀約，來到銅鑼灣伊榮街，另一間有「關西沾麵冠軍」之稱的店子《富士山55》，一試它的招牌沾麵。







講真，這家店舖的位置雖然唔算難搵，不過門面十分低調，沒有顯眼的招牌，若非友人一再提點是位於富豪香港酒店後面，隨時會跟它擦身而過。按門內進，舖面細細，四周裝潢簡約，而且座位不多，除了近門口和開放式廚房對出的幾個面壁位外，就只有 3 張 4 人桌，如果坐滿客人的話，相信氣氛一定很熱鬧。

安坐後，先細閱餐牌，除了四款拉麵，如白湯豚骨拉麵、濃香櫻花蝦拉麵、二朗系拉麵和辛辣拉麵外，店裡現時還有五款沾麵供應，當中包括特濃豚骨沾麵、豚骨沾麵、濃香櫻蝦沾麵、辛辣沾麵、季節限定的牛介沾麵及一款招牌名古屋撈麵，選擇也算豐富。另外食客亦可以揀選麵身的硬度，如較硬、較柔、標準和是否要走蔥及走筍。當然如果愛吃配料的話，更可以另加叉燒、半熟蛋、竹筍、黑木耳、紫菜、椰菜等。



既然一心為沾麵而來，還是別三心兩意，在幾款沾麵中揀了較吸引的濃香櫻蝦沾麵 ($88)。如果有吃過沾麵，相信都應該會知道沾麵的食法是把拉麵蘸上濃湯汁來吃，不過如果閣下是首次到訪又沒吃過沾麵的話，其實店裡亦有圖文並茂的指示，講解如何品嚐正宗日本沾麵的步驟，做法十分周到。

唔知大家有無留意到每張檯面都放置咗一個小型的電磁爐呢？原來是方便在湯底冷卻時加熱，令食客吃麵條時，由頭到尾都咁熱辣辣，實在非常貼心。







先挾開面頭的配料，麵條望落去粗幼度適中，咬下柔韌度十足，不易斷又爽口；而湯底方面，據說除咗以豬筒骨和豬頭骨熬製外，仲放進了魚介，唔怪得沾完醬汁後，把麵條吸進口時，既有豐富的肉味，亦有魚鮮味，當然再加上澎湃的櫻花蝦，令沾麵吃起來充滿著鹹鮮的蝦油香，味道匹配，好惹味。

至於薄切叉燒，雖然油香不多，但入口鬆軟；與爽脆的竹筍和口感滑軟、帶淡淡甜味的半熟蛋同吃最合拍。

其實吃完麵後的剩湯，食客是可以另加 $20，柯打日式芝士雜炊，原來所謂芝士雜炊，即是於湯內加入以珍珠米煮成的白飯和荷蘭車打芝士，撈拌做成滋味濃香的芝士湯飯，據說舀起時能拉出一絲絲芝士，聽落吸引，不過由於先前已經另點了一客名古屋撈麵同兩客雞軟骨棒，怕眼闊肚窄，還是讓自己留個藉口，下次再戰。





至於友人點的名古屋撈麵 ($88)，依店員教路，先將蛋、免治豚肉、紫菜、蔥粒和拉麵等撈勻。豚肉由於拌入了秘醬，入口嚐到陣陣黑椒的辛辣味，幸好絕不刺鼻攻喉，反而帶點醒胃的甜香；用來配肥瘦分明、焦香肉甜的叉燒和質感彈牙細滑、煙韌得來又有嚼勁的麵條吃，滋味滿分。

兩客雞軟骨棒，分別點了燒汁沙律醬及 wasabi 沙律醬兩款口味，自家製的雞軟骨棒，以雞肉夾雜雞軟骨製成，咬下雞肉極之嫩滑香口，帶軟骨的嚼勁，前者配上蔥花及搶鏡的燒汁沙律醬 ($28/2支)，味道猶勝大阪燒，風味十足。至於後者 wasabi 沙律醬 ($28/2支)，以香甜蜜糖加上惹味芥末製成醬汁，入口清新得來又帶點嗆鼻，能刺激食慾，與雞軟骨棒味道匹配。

臨走時發現原來店裡仲有一款期間限定的柚子素麵供應，適合素食人士，看來下次 Green Monday 又多個好地方了。

============================================

感謝 mjqueen7e 提供以上資料

mjqueen7e 的網誌: http://www.openrice.com/zh/gourmet/reviews.htm?userid=66478&city=hongkong

============================================