TAMAGO＝Japan Egg

上星期六出席咗由日本卵輸出準備分科会舉辦嘅日本雞蛋工作坊活動。

當日由Kei San去主持，即場示範咗用日本蛋整三款日本常見嘅家庭料理同甜品。

有我經常諗唔到煮咩做弁当時就會整嘅卵焼き（玉子燒）；

我好耐無整過嘅オムライス（蛋包飯）；

仲有プリン（雞蛋布甸）。

圖片來源：日本畜産物輸出促進協議会／画像お借りしています

喺日本飲食文化中，食「生雞蛋」係好常見。
卵かけご飯（生雞蛋拌飯）、月見うどん（月見烏冬）、
鍋物すき焼き（壽喜燒）用嚟蘸牛肉、菜都會食用到生雞蛋。
因為講究安全，日本雞蛋係世界上唯一可用作生食用。
而為咗預防雞蛋受到沙門氏菌同禽流感病毒嘅入侵，都有一套好嚴謹嘅安全檢測同防疫對策。TAMAGO＝JAPAN EGG呢個標誌就係おいしさ（美味）嘅證明。

由我開始自己煮食時我就用日本蛋，唔經唔覺都食咗6、7年？
除咗覺得較安全之外，比起其他國家出產嘅蛋蛋味香濃啲，而且無腥味。
曾經有段時間因為禽流感香港停咗輸入日本蛋，嗰段時間簡直係痛苦！
雞蛋係我每日都要用到嘅食材嚟，唯有局住要食返泰國蛋、美國蛋。
但嗰排食嘅雞蛋好多時都帶有血絲，而且就算煮熟後都依然會食到腥味。
當有返日本蛋供輸入時，我即刻買返日本蛋食，之後一直食用到而家。

基本上我每日都會食一隻蛋，有時可能會食兩隻，視乎當日多唔多肉類食。
整蛋糕、麵包都會用到雞蛋，就係咁可能入一入廚房就用咗半排蛋。
如果雪櫃入面無一排或以上嘅雞蛋時，我會覺得不安。
曾經試過因為雪櫃少過一排蛋，我又行唔開去買，嗰次最後我上網一次過買咗4排。

可能有留意過日本蛋嘅食用日期都會發現，包裝上個賞味期限（最佳賞味日期）通常都較短。
因為係用產卵日起計21日嚟定個期限，而呢個日期其實係指可以用嚟「生食用」嘅日期。
日本食物表示期限主要分兩種—消費期限同賞味期限。
消費期限：必須在期限內食用；
賞味期限：作為參考用，就算過期都唔會話即刻變壞唔食得。
通常超級市場嘅職員／旁邊啲太太都會話：「就算過咗嗰個日期食都無問題架！我成日都係咁食。」
的確，我自己都係咁。

活動當日仲有袋禮物，入面大部份都係同雞蛋有關嘅。
當中個Egg Timer我曾經係諗過買架，不過見一個唔平嘅最後放棄咗。
所以收到呢個非常開心！

另外熊仔樣嗰個timer都好啱用，平時煮嘢食一個爐頭係要用到一個timer。
屋企而家有兩個timer，有時唔夠用要開埋iphone入面嗰個嚟用。
而家多一個可以煮飯時用啦，唔知點解覺得煮嘢食都係用返實物嘅timer先方便。

 

日本畜産物輸出促進協議会
http://jlec-pr.jp/ja/ （日）
http://jlec-pr.jp/egg.html（英）

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================