打冷

如果出街食飯的話，我哋多數會揀一啲屋企煮唔到／唔會煮嘅菜嚟食。
中菜的話，上海菜、京菜同潮州菜一定入選三甲。
上海菜同京菜勉強都可以話2個人都叫到餸，但潮州打冷的話，一定要一大班人先可以叫多幾款餸食。

近幾年大概每年都會有一次約埋一大班人去九龍城打冷，但從來都無影到相，亦無打blog。
不過今次同平時叫開嘅餸有啲唔同，一定要俾相機食先。
影得相，點都要寫返個blog先得。

打冷多數都會有啲幾乎指定會叫嘅菜，例如滷水類、蠔餅呢啲；亦有啲每次見到都唔太敢叫嘅，其中最有代表性嘅就係佢—

【凍蟹】
食咗咁多次打冷今次終於有機會食到凍蟹啦！（就係因為佢今次點都要俾部相機食先）
凍蟹比起平時自助餐食到嘅皇帝蟹腳少咗份海水味，同時多咗份鮮味。
食自助餐我都唔鍾意食蟹腳，就係因為覺得啲海水味太搶、太咸。
呢晚我仲分到隻大蟹鉗，好厚肉，拎住佢就好似拎住杯雪糕咁，食得好滿足。
而家食過一次，知道佢有幾咁好味嘅時候，下次去打冷時見到佢我又會心思思想食架啦。

【椒鹽瀨尿蝦】
當日我哋去到時已經落晒柯打，基本上除咗知有凍蟹之外，其他乜都唔知。
出現咗好多之前都無叫過嘅餸，椒鹽瀨尿蝦係其中一樣。
我好少食瀨尿蝦，覺得佢難拆，拆完又唔多肉食。
同旦那さん一齊去食，拆蝦拆蟹呢個重任可以交俾佢。
而且今次碟瀨尿蝦肉厚，仲好鬼死咁多膏。
喺唔洗剝蝦又啖啖肉嘅情況下，我都食咗好幾舊。

【豆醬煮魚】
我初頭以為係蒸魚，因為條魚好滑，點知一問先知原來係煮魚。
老闆呢條魚如果拎去蒸的話會鞋，要咁煮先好食。
平時我哋兩個人出街叫唔到咩海鮮，所以今晚有咁多海鮮食真係好開心。

【上湯浸菜】
個菜名係我幫佢作嘅，實質個餸名係咩我都唔知。
淨係知道呢碟菜入面有好多蟶子肉，個湯非常鮮甜。

【炒菜】
我都唔記咗呢碟係咩菜嚟，因為我無食到，我食上面個上湯浸菜。

【炸豆腐】
看似簡單，但要喺屋企要炸到外酥內軟真係好難，所以呢個每次都會叫。

【胡椒豬肚湯】
呢度我只飲過兩款湯，一款係蕃茄薯仔九肚魚，另一款就係胡椒豬肚湯。
而家呢啲天氣當然係揀後者啦。

我好怕食中國芹菜同芫莤，唯獨佢出現喺呢個湯度我係完全食到。
雖然今次個湯辣咗少少，但我都飲咗兩碗，飲完成個人暖晒。

【鵝掌翼】
實在太唔慣俾相機食先，特別係同屋企人出去食飯嗰陣。
一路忙緊我呢晚嘅海鮮餐時我已經唔係好記得部相機到底食咗未。
就係咁，碟鵝掌食到得返半碟時我先記得影。

【炒蟶子】
蟶子都係食食下先記得影，搞到碟蟶子好似得返堆殼無肉食咁。

【蠔烙】
仲叫咗個煎蠔餅架，不過連半碟相都無，完全唔記得咗影。
不過真係呢度嘅蠔餅先好食，出面好多食肆嗰啲都係煎蠔pancake嚟，完全無咗嗰種酥脆香口嘅感覺，所以只會嚟呢度打冷先會叫蠔餅。

【炒麵線】
本來個麵線有韮菜同肉，但因為唔食嘅所以飛咗走，如果唔係碟嘢個賣相應該會吸引啲。

【炒飯】
飯麵我都無食到，因為我已經好飽同埋我要留肚食甜品。

【反沙芋】
我唔食芋頭嘅，不過同枱會食嘅人都話好好味。
坐喺隔離嘅我覺得陣芋頭味真係好鬼勁，愛食芋頭嘅人會形容佢做香。

【南瓜粿】
芋頭之後南瓜我都唔食嘅！
但呢度個南瓜粿，據非正式統計所得知，多數唔食南瓜嘅人都好鍾意食南瓜粿，包括介紹南瓜粿俾我食嘅嗰位，原因係佢完全無南瓜味嘅。

【水晶包】
食完個南瓜粿其實都飽到上心口架啦，不過我好掛住個水晶包。
見大家又仲可以食到一粒半粒時，於是追加埋佢。
最初嚟打冷我鍾意食薑薯糖水架，食食下我鍾意食水晶包同南瓜粿，之後都無再叫過薑薯。
水晶包一隻係紅豆、一隻係花生，唔食nuts嘅我當然只食紅豆啦。
食埋粒水晶包係一個好完美嘅句號，成餐飯好完滿，好滿足！

創發潮州飯店
九龍城城南道60至62號

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================