梅仕事

2016.06.16 梅仕事デビュー

6月係浸梅酒嘅季節。
梅酒同梅汁除咗飲之外仲可以用嚟煮餸，係其中一個原因令我想加入浸梅行列。

喺浸梅酒嘅季節期間，通常賣梅嘅地方旁邊都會有埋酒、冰砂糖甚至浸酒用嘅樽賣。
有啲產品係一個細細嘅樽，裡面已經有酒，只要加糖同想浸嘅生果就可以開始。
某啲生果可以快到3日就可以飲，完全新手都無難度。

我本身唔係話好飲酒嘅人。
梅酒呢啲較甜同有果香嘅酒比較接近我鍾意飲嘅，所以今年心郁郁想自己試浸。
煮韓國餸時久唔久就需要用到梅汁，所以想自己浸啲嚟煮餸用。
而且夏天可以加梳打水沖嚟飲消下暑，唔洗下下飲汽水凍咖啡嘛。

今次買咗1.5kg完熟嘅南高梅。
多數浸都係會揀青梅去浸梅酒，但呢種黃色完熟嘅南高梅帶一陣陣嘅桃香味。
用佢嚟浸酒會比用青梅更fruity，我一路抹乾梅時就一路聞到好香。

準備咗1個4L嘅樽去浸梅酒同1.5L嘅樽去浸梅汁。
梅汁浸嘅嘅時間同存放嘅時間都較梅酒短，所以浸樽細嘅。

平時整jam啲樽夠細，可以放入煲煲熱殺菌。
但用同一方法消毒咁大個樽的話確實有啲難度。
我直接用呢支酒精消毒劑去除菌消毒。
噴完酒精之後再用廚房紙抹一次就可以。

酒我用嘅係果実酒用焼酎，貪佢無色無臭，可以最直接做到果酒本身嘅味道出嚟。
焼酎以外仲可以用泡盛、冧酒甚至白蘭地都可以。
酒精濃度最好係用35%，如果濃度太低（低過25%）好難浸出梅味。
酒精濃度低亦會較容易變壞甚至發霉，較難長時間保存。

糖我用氷砂糖，因為佢純度較高少雜質。
氷砂糖融嘅速度同梅出味嘅時間比較平均，有足夠時間俾梅味慢慢滲出。
當然用砂糖、三溫糖、黑糖同蜜糖都可以。

梅シロップ（梅汁）

• 完熟南高梅　500g
• 氷砂糖　500g
• 醋　100ml

1. 洗淨梅後抹乾水份，用竹籤將梅蒂挑走；
2. 用叉喺梅度吉啲㝫，一層梅一層冰糖咁間放入樽；
3. 最加上醋。

每日搖晃個樽一次，等啲梅同糖可以混合得好啲。
存放喺日光照射唔到、陰涼嘅地方，大概2個禮拜後可以飲用。

如果用青梅的話，要先將梅浸水2個鐘去除澀味。
再將梅急凍一晚先用嚟浸梅汁，咁樣梅會更快出味同時可以阻止青梅發酵。
不過今次我用完熟嘅梅所以我跳咗呢2個步驟。

梅酒

• 完熟南高梅　1Kg
• 氷砂糖　800g
• 果実酒用焼酎（35度焼酎）　1.8L

1. 洗淨梅後抹乾水份，用竹籤將梅蒂挑走；
2. 一層梅一層冰糖咁間放入樽；
3. 最後加入焼酎。

同樣如果用青梅的話要先將梅浸水2個鐘去除澀味。
1個禮拜後搖一搖個樽等啲糖均勻啲。
存放喺日光照射唔到、陰涼嘅地方。
1年後等啲梅嘅精華滲透晒落啲酒度（熟成）後就可以飲。

期待佢哋之後嘅變化。

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================