同hime去街

2016.06.22 ワクチン接種日

上個月同hime出街去打針。
一年先出得一次街，對hime嚟講出街真係好大壓力。
每次book咗打針時間之後我都會話俾hime知，到一個禮拜左右開始再提佢，等佢有個心理準備。
但到出到街嗰刻呢個囡都係好驚。

知個囡驚，每次我都會想用最快最短嘅時間去完成件事。
hime出街唯一一個問題：車！

為咗唔洗個囡喺大熱天時又驚又大壓力喺街等的士，上年試過用個app去call的士。
由未出門口嗰刻開始call足半個鐘都無人應。
車程太短唔會有8折的士會啋我哋，最後都係好似平時咁喺街度截。
喺截的士期間，因為hime周圍太多人聲同太近嘅車聲，嚇到大叫。

今年旦那さん提議試下坐Uber。
出街前一日去咗申請個a/c，準備好出門口前我開個app call車。
一call就有車接咗我哋order，打俾司機同佢講聲我哋有隻貓，順便問佢大概幾耐我哋預時間落樓啦。
點知司機話天氣太熱，話到咗樓下打俾我哋先落樓。

等出門口期間，hime喺袋入面已經覺得不安，係咁叫。
過咗大概5分鐘，架車就到咗我哋樓下。
由出門口到上車，不停同hime傾住計話佢知而家做乜。
比上年好嘅係，唔洗行出去截的士，周圍嘅環境都無咁嘈，hime都無話好似上年咁嚇到大叫。

當架車出咗大路，hime開始驚，之後開始發出驚嘅叫聲。
喺我話俾個囡知點解會嘈到架車凳叫佢唔洗驚嘅時候，喺上天橋、斜路呢啲容易凳嘅位置時，司機係明顯揸得慢咗。
雖然司機好細心，但呢個囡開始咗驚，喺剩低嘅2/3車程佢都係驚。

條片坐車嘅時候影嘅。
車程去到後半見個囡擘大個口以為準備打喊路啦，點知佢擘大咗個口之後就無合返埋，就知係個囡真係好驚。
諗住俾平時佢有玩嘅公仔同佢一齊出門口會好少少啦，雖然hime攬住咗，但好似作用都不大。
好在過咗陣就到，當架車可以落天橋準備到時，個囡開始定啲。

由於診所門口嘅位置唔太方便上落客，好多的士都係唔會話停正喺診所門口。
每次都係落車之後，又行又等過馬路先可以去到診所。
差唔多到時司機問我哋診所位置喺邊，停正正喺診所門口俾我哋。
加上Uber係用credit card俾錢，落車只需要顧住hime就可以，唔洗又拎個銀包出嚟又俾錢又找錢咁煩。

入到診所有隻金毛尋回犬趴咗喺度，hime第一次見到咁大隻狗。
hime喺等見醫生嗰陣不時觀察隻狗，每當隻狗郁一郁佢又會嚇一嚇。
雖然隻金毛好乖，但怕狗嘅我都一樣會俾隻狗嚇到。

今年hime又比上年輕咗，連續輕咗3年。（’13　4.8kg→ ’16　4.1kg）
不過醫生話，雖然係輕咗，但都仲摸到係有啲脂肪嘅，亦睇唔到係因為疾病嘅問題令佢輕，所以都唔洗話擔心。

上年hime皮膚有啲皮屑問題，本來醫生建議我買支亞麻籽油俾hime食。
支油實在太大支，又唔平，加上我唔肯定個囡會食。
當我知道解決方法係要食呢類補充劑時，我就決定先由平時hime嘅飲食上著手先。
因為呢個囡係食得太清，我試過蒸肉俾佢食，佢食得好開心；
但用炒的話，只要多少少油都唔鍾意，寧願唔食。

我將屋企平時用嘅煮食油轉咗個葵花籽油，平時hime食濕糧時我加一滴仔落去。
等佢慢慢習慣，食返多啲油份。
經過咗一年，醫生話今年雖然仲有少少皮屑，但比上年有改善。
醫生以為我買咗支亞麻籽油，我話佢知我用咗咩方法，佢話都可以。

最後同醫生講返每次同hime滴完FRONTLINE® Plus，hime都會用盡所有方法又抹又洗啲藥。
醫生話有可能hime皮膚對Frontline敏感，所以今次試吓轉用REVOLUTION® (selamectin)，睇吓會唔會好啲。

打埋針，配埋杜蟲杜蝨藥之後，我哋就坐喺診所度call Uber。
我哋上年沿途截的士，最後去咗買Starbucks飲，我湊住個囡，旦那さん去咗等的士。
今次我哋係等到架車嚟到，我哋先喺診所走，唔洗再喺條街度無了期咁等。

返到屋企睇一睇個電話，原來今次來回嘅車錢同坐的士差唔多。
下次同囡出街時仲有Uber的話，我都係會揀返Uber。

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================