結婚記念日・２年目突入

2016.11.14 1st Wedding Anniversary

上年結婚之後我哋去咗Clipper Lounge食buffet。
今年1週年我哋都揀返去呢度慶祝，同之前一樣，早早就上網book定位啦。

每次第一碟拎嘅都一定係海鮮，只要個buffet有生蠔的話我都一定會拎生蠔。
可惜今次啲蠔比上次5月嗰陣嚟食嘅細隻咗，又無乜肉食，同埋腥腥哋。
我食咗呢3隻之後就無再拎啦，轉陣主力食鮑魚。
啲鮑魚今次大隻咗又好味咗，夠腍同時又好爽口，我應該食咗6-7隻。

拎咗三隻大蝦，點知係有怪味，所以無食到。
始終都係龍蝦拑最好食，啖啖肉。

刺身有4款。
我最鍾意食鯛魚，旦那さん比較鍾意食油甘魚。
三文魚就中規中矩，吞拿魚依然係包尾，好在我叫師傅唔好俾咁多我。

實在太鍾意鯛魚，所以又拎多2件。

卷物當中我最鍾意食太卷。
雖然盡量唔食咁多飯，但每次見到太卷都會忍唔住要食一件。
今次見有加州卷所以又拎咗一件，但都係太卷好味。

冷盤除咗個煙三文魚之外，其他都唔好食。
而且樣樣食物都好粗好大件，感覺做得唔得細緻。

之前都無走過去呢part度拎過嘢食，今次終於記得行過去。
包就實在無位放得落啦，同埋無話有想試嘅包，所以都係無食到。
拎咗少少沙律，但返到位先發現自己無落到醬。
4款芝士每樣都拎咗少少試，Brie de Meaux 配埋 Cracker食都幾好味。

今次啲蒸扇貝蒸過咗龍唔好食，其他都無乜特別。

之前試過上海粗炒同炒飯都麻麻哋，所以今次都無拎到。

個四季豆係咁多款熱葷當中最好味，炒得幾香口野味，好食到我要去拎多轉。
元蹄好腍同好骨膠原，不過食落有啲漏。
蟹拑唔脆所以唔太好食；乳鴿就比比上次咸同乾所以都唔好味；小籠包就正正常常啦。

Roast Beef係咁多次嚟講最好味嘅一次。
成片都唔會話太生，亦唔會話有啲位乾，夠晒Juicy。

之前拎Roast Beef時次次都係無晒Yorkshire Pudding。
今次見有就拎咗個，但原來無乜特別。

湯有兩款，西式係蟹肉湯。
飲落好濃嘅海鮮味，feel到個湯底好足料，不過我麻麻哋。

中式湯係雲吞雞湯。
相比起蟹湯，我哋一致鍾意呢個雞湯。
成個湯好鮮甜，完全唔覺咸。
啲雞肉好滑完全唔鞋，雲吞係鮮肉餡都幾好味。

酸辣湯本身係上海湯麵個湯底嚟，不過我無食到個麵，淨係要咗兩啖湯。
不過個湯唔多夠辣，得酸味。

本來今次個自助餐主題係大閘蟹，但因為二噁英，所以隻蟹變咗做象拔蚌。
因為我唔食大閘蟹嘅，滿心歡喜整走咗隻蟹好開心啦。
點知呢隻象拔蚌連我呢個唔怕腥嘅人都覺得佢好腥，呢2隻嘢最後係完隻推咗去枱角無食到。

豆沙鍋餅都幾好味，但我期待嘅桂花糕就唔好食啦。

每次都要食好多好多球先滿足嘅雪糕雪葩。
旦那さん食咗6個，其中5個係芒果；
我都食咗5個，其中4個都係我至愛嘅酸嘢－紅莓同青檸，不過今次無熱情果。

甜品我覺得今次少咗好多我有興趣食嘅，好多都係mousse同panna cotta。
一隻碟我已經拎晒我有興趣。
除咗個Crème Brûlée之外，我竟然愛上咗⋯⋯

macaron
之前食過一次macaron，好甜，甜到食咗一啖就食唔落。
今次見到諗住又再試吓啦，點知改觀。
個甜完全係可以接受，加上中間個buttercream係咖啡味，感覺上更加無咁甜。
最後我一共食咗7個macaron（笑）。

慶祝結婚1週年，酒店今次準備嘅蛋糕係Opéra，係出面甜品櫃無嘅款。
我雖然唔好朱古力類蛋糕，但呢個又幾好食喎。

上次我係叫Latte，不過今次都係叫返杯Black算。
因為我要襯埋我啲macaron，同埋太飽唔可以再飲啲奶落肚啦。

實在食到太飽啦，旦那さん今次都由熱朱古力轉返去凍檸茶。

上次眨吓眼就由中環返到屋企嘅感覺非常好，今次都好難唔繼續啦。
坐的士除咗我哋開心之外，hime都一樣咁開心，因為可以快啲有人返到屋企陪佢。

 

 

Clipper Lounge
M/F, 5 Connaught Road, Central, Hong Kong

====================================

感謝 tabitachi 提供以上資料

tabitachi的網誌: http://tabitachi.wordpress.com/

====================================