平安夜大餐 (前菜。主菜。甜品)
大家聖誕假期過得開心嗎 ^^ 袁太同大家補句"Merry Christmas"先，唔知大家去左邊樹慶祝呢 ??? 袁生袁太當然靜靜地在家度過，因為我地兩個最怕多人的地方，而平安夜大餐依然由我負責，想知袁生整左什麼食物，要將時間回到平安夜當晚了。
今年依然分前菜，主菜同甜品，首先想到甜品方面決定整麵包布甸，而整麵包布甸所剩的麵包皮放入焗爐焗酊脆卜卜，就可以用來整沙律，係吉吉島買包沙律菜，加上脆麵包粒，烤雞肉，雞蛋已經好美味了，不過袁太好大意忘記買沙律汁，所以就膽粗粗用芥末+蜜糖+橄欖油拌勻，估唔到袁生反而喜愛這種沙律汁的味道
前菜 : 脆麵包粒烤雞沙律配芥末蜜糖汁
材料 : 沙律菜1包，麵包皮，雞蛋2隻，冇皮雞柳
做法 : 麵包加入香草，蒜鹽，橄欖油拌勻，放入焗爐用180C焗5分鐘備用，雞柳用黑胡椒，鹽拌勻醃30分鐘，放入焗爐用200C焗10分鐘至熟透，取出待涼切粒，雞蛋放入滾水中用中火煮15分鐘，待涼去蛋殼後將雞蛋切半
一包沙律菜放入碟內，灑上脆麵包粒及烤雞肉，再放入雞蛋，食時淋上芥末蜜糖汁拌勻即可
主菜 : 烤雞蘑菇辣肉腸Pizza
材料(Pizza皮) : 高筋麵包250g，酵母25g，雞蛋1隻，水100ml，鹽
做法 : 高筋麵粉篩入大碗內，加入酵母，雞蛋，鹽，水拌勻後搓成麵糰，包上保鮮紙，放室溫下發酵2小時或至2倍大，焗爐用200C預熱10分鐘，將已發酵好的麵糰壓成厚批底，批底上先塗上茄醬，再放上自己喜愛的材料(已切片蘑菇，辣肉腸，烤雞肉，菠蘿，火腿，粟米，最後灑上多多芝士碎，放入焗爐用200C焗15分鐘或至芝士溶化即可
甜品 : 麵包布甸
材料 : 方包2片，淡忌廉150ml，糖40g，雞蛋3隻，牛奶150ml，牛油，雲呢拿油
![]()
做法 : 焗爐用200C預熱10分鐘，麵包去皮切粒放入焗盤內，麵包塗上牛油，雞蛋打勻後加入糖拌勻，再加入淡忌廉，牛奶，雲呢拿油拌勻，放入麵包內至八分滿，放入焗爐用200C焗30分鐘或金黃色即可
走出廚房同袁生傾計只係短短一兩分鐘時間，但入廚房時己發覺原來焗燶左少少，不過好彩味道依然Very Good。
感謝 袁太廚房 提供以上資料
個人日誌: http://elanie-kitchen.blogspot.hk/
