西瓜 ... 相信有好多人都喜愛，而且夏天必然係最佳消暑食品
以前我會去街市買1/4個西瓜回來起肉放雪櫃，其餘既當然係掉晒佢，而家諗起都覺得好浪費，因為除左西瓜肉外，反而西瓜皮的消暑功能亦相當之好，所以我而家每逢買西瓜回來，都會想盡辦法用盡佢
例如 : 西瓜肉除左當生果外，可以用來做沙律或做小菜，而西瓜皮亦都可以做掠拌或如果大家有養狗狗的話，都可以將西瓜皮切幼絲俾寵物食，唔講唔知，其實西瓜皮對狗狗都好有益處
由於袁生吩咐袁太一定要去街市買西瓜做生果的關係，所以今次的西瓜又演變了三重奏美食
(一) 最簡單當然係起肉做飯後果
(二) 起肉後的西瓜皮千其千其唔好掉，洗淨再加蜜棗一齊煲水飲，好有消暑功效架
(三) 特別為袁生而製作的西瓜沙冰，袁生簡直超愛
袁太講左咁多，大家係咪覺得西瓜原來有好多用途呢，咁大家仲唔襯住呢個炎熱夏天，拿拿臨去買個西瓜回來炮製自己獨一無二的美食 ???
消暑西瓜三重奏
西瓜沙冰
~ 將已切件的西瓜連同1/2份量的冰塊一同放入攪拌機，斷斷續續打至幼滑狀態，時間大約30秒左右
再放入其餘1/2份量冰塊再攪約數分鐘就完成極度美味的西瓜沙冰了，絕對係夏天透心涼之選 !
西瓜皮蜜棗水 ~ 西瓜皮1/4個，蜜棗6粒，水適量
將西瓜皮去掉紅肉，只留白肉及綠色外皮洗淨，煲內放入適量水，滾後加入蜜棗及西瓜皮，用大火煲30分鐘後轉慢火煲1小時
熄火待涼放入雪櫃雪凍即可
今年夏天日日都咁熱，大家一定出好多汗，西瓜皮有迅速補充流失水份的功效架 !
感謝 袁太廚房 提供以上資料
個人日誌: http://elanie-kitchen.blogspot.hk/
