"涼瓜" - 有人愛，亦有人不愛，唔知大家屬於邊種呢 ???
而袁太就企係愛呢邊，袁生當然係同我攪對抗，企係不愛個邊，其實大部份人唔喜愛食涼瓜的原因都係怕苦姐，只要行出第一步，就會覺得涼瓜其實味道唔錯，不過話雖如此，呢幾句說話我曾經同袁生講過，袁生當然係唔理我喇，仲同我講左一大堆佢所謂的道理
事緣係咁，大約上個月我想整涼瓜做晚餐，袁生一口拒絕"我唔食涼瓜，咁鬼苦，妳千萬不要煮，就算煮左我都唔會食"，大家係咪覺得袁生好鬼串，好鬼賤格呢 ???
當我講，你唔試又點知唔好味呢，點知袁生一句突埋黎，"榴槤夠好味喇，又唔見妳食"，我頂 ... 真係下句都唔知可以講咩好
今日行經街市見涼瓜大大個，就忍唔住買左一個回家整煎蛋做晚餐，食飯時候，我冇提過煎蛋入面有涼瓜，袁生亦都食唔出，到食完之際，我先同袁生開估入面有涼瓜架，但袁生居然冇咩反應，仲話味道唔錯，唔知今次的涼瓜煎蛋攻略可唔可以令到袁生對涼瓜改觀呢 ???
涼瓜菜脯煎蛋
材料 : 涼瓜<1個>，菜脯<適量>，雞蛋<3隻>
做法 :
1. 涼瓜切薄片，用少許鹽醃30分鐘去澀味，洗淨瀝乾水份，菜脯切粒備用
2. 雞蛋打發成蛋液，加少許生抽調味拌勻
3. 燒紅白鑊，將涼瓜片，菜脯粒放入鑊中烘乾水份，盛起待涼後放入蛋液內拌勻
4. 燒紅鑊，將蛋液逐少逐少煎成蛋餅狀即可
感謝 袁太廚房 提供以上資料
個人日誌: http://elanie-kitchen.blogspot.hk/
