袁生突然間話想飲西式湯，重要係夜晚十一點的時候提出，究竟袁生係咪想玩野呢 ???
不過既然開到口，我當然會煮個湯俾佢，但夜爛人靜，街市又收檔，超市又關門，咁事問我應該去邊度買材料呢 ???
好好彩地雪櫃百寶箱有材料可以整周打湯，但居然冇主要材料 : 蜆，雖然冇蜆但就有雞扒，咁就可以整周打雞肉湯，另外加左我至愛的素翅，大家覺得個賣相係咪高貴左呢，煮好後就俾袁生試下，袁生居然大讚話好好味，仲話初時叫我咁夜先煮湯，多數以為袁太會好簡單咁整罐頭湯俾佢飲，估唔到袁太會用雪櫃剩餘物資黎整個西式湯，真係唔到唔寫個"服"字俾我 !
周打雞肉素翅湯
材料 : 雞扒<1塊>，薯仔<1個>，洋蔥<半個>，清雞湯<1L>，淡忌廉<4湯匙>，麵粉，水<適量>，雜豆<1包>，素翅<適量>
做法 :
1. 薯仔，洋蔥去皮後切粒，雞扒切粒灼熟盛起，素翅用水煮約5分鐘盛起備用
2. 燒紅鑊，爆香洋蔥，薯仔，加入清雞湯及水煮至薯仔軟身
3. 再加入雞肉，淡忌廉，麵粉，水煮滾
4. 最後加入素翅，雜豆煮片段，加少許鹽，黑胡椒碎調味即可
感謝 袁太廚房 提供以上資料
個人日誌: http://elanie-kitchen.blogspot.hk/
