又到Happy Friday的時候
每當星期五都想為袁生或自己整個完美的早餐，不過可惜好多次都俾袁生拒絕了，次次都話 : 晨咁早起身整早餐咁辛苦，求求其其買個包咪算囉，唉 ... 雖然話出去買早餐係好方便，但點都唔夠自己親自整早餐咁好，何況我都唔係每個星期五都要求整早餐，只不過係一個月一次姐
不過袁生依然都係唔需要我整，但袁太係唔會放棄，所以就決定來一次先斬後奏，整左先算，段估整左袁生唔會唔食掛，前一日買定好材料，整定麵包，今日晨咁早起身開工
雖然好鬼眼訓，但希望袁生真係會食得開心，食得健康，我知平時袁生放假最喜愛的早餐一定係食牛扒炒蛋，但袁太廚房出品既一定而健康為主
所以就用蔬菜配雞肉，再加上乳酪醬，自家製小法包，味道清新又健康，不過由於冇時間煲奶茶，所以簡簡單單加盒牛奶，唔知袁生喜唔喜愛今日袁太為佢準備的愛心美味早餐呢 ???
好喇 ! 我要出門口上班lu，唔講住喇，Bye !
田園雞絲焗乳酪法包
材料(小法包) : 高筋麵粉<300g>，低筋麵粉<100g>，鹽<5g>，酵母<1茶匙>，水<300g>
做法 :
1. 將麵粉過篩後與其他材料拌勻，搓成光滑麵糰，放入碗中蓋上保鮮紙發酵60分鐘或至兩倍大
2. 排氣，分割麵糰後鬆弛15分鐘，再發酵30分鐘
3. 放入焗爐用180C焗25分鐘，取出待涼備用
************************************************************************************************
材料(乳酪醬+餡料) : 原味乳酪<2茶匙>，雞蛋<1隻>，香草，鹽<適量>，生菜<適量>，蕃茄<半個>，粟米粒<少許>，雞扒<1塊>
做法 :
1. 雞扒去皮放入滾水中煮熟盛起待涼撕成絲，用少許海鹽，黑胡椒拌勻
2. 將原味乳酪放入碗中，加入雞蛋，香草，鹽拌勻成醬
3. 之前焗好的法包橫切開，將乳酪醬搽在法包內，再放入焗爐用180C焗5分鐘至法包稍為外脆內軟
4. 生菜切絲，蕃茄切片，粟米粒洗淨備用
5. 將法包從焗爐取出放入生菜絲，蕃茄片，雞絲，最後放上粟米粒即可
感謝 袁太廚房 提供以上資料
個人日誌: http://elanie-kitchen.blogspot.hk/
