每逢放假的日子，都會為下午茶的事而煩惱，以往都會簡簡單單買粉果燒賣就算，但食得多都厭，上次就整左熱狗，袁生好滿意，今次又攪咩新意思好呢 ???
夏天來了，又係煲薏米水消下暑，以往煲薏米水都係用檸檬，但今次想轉一轉材料，經過生果店見舊橙大大個，如果將檸檬轉橙，唔知味道會唔會好飲D呢 ???
答案係 :會
用橙去煲薏米水，味道好味過用檸檬煲的多多聲，酸酸甜甜，真係好啱夏天飲，煲好後放入雪櫃雪到凍一凍，太正喇，袁生都好鐘意，下午茶的飲品就完成，咁整咩食物襯薏米水呢 ???
記得以前係街買綠豆餅食過後，我都袁生簡直大愛，但屋企附近絕對搵唔到綠豆餅的出現，唯一辦法就係自己整，整的過程好複雜，不過好彩無論賣相同味道都好好，反而仲好味過街買
整完綠豆餅後薏米水都雪到凍冰冰，一個休閒的下午茶就可以開始
雖然唔知薏米水同綠豆餅夾唔夾，但真係太好食太好飲，真係好滿足 !
材料(綠豆餅)
油酥皮 : 固體菜油<40g>，無鹽牛油<10g>，低筋麵粉<40g>，鹽，油，奶粉<少許>
水皮 : 低筋麵粉<40g>，水<25g>，豬油，砂糖<10g>
餡料 : 綠豆<50g>，砂糖<20g>(砂糖份量可自行調較)，水，油<適量>
做法
(餡料) :
綠豆洗淨浸水6小時，加水煮至綠豆爛，待綠豆煮好後加入砂糖同油拌勻成餡料備
(油酥皮) :
牛油，油，鹽拌勻，加入奶粉及低筋麵粉拌勻成糰，用保鮮紙包好放入雪櫃冷藏至硬身
(水皮) :
豬油，砂糖，水拌勻，加入低筋麵粉拌勻成麵糰，用保鮮紙包好放入雪櫃冷藏備用
用麵棍將水皮壓薄，將油酥皮包好，再用麵棍將酥皮壓薄成長方形
依次序摺成四層成中式酥皮，再放雪櫃冷藏至硬身
用麵棍將酥皮壓成薄片，包入已處理好的綠豆餡，一個個平放在焗盤上
再掃上蛋液，放入焗爐用200C焗12-15分鐘即可
材料(香橙冰凍薏米水) : 鮮橙汁<2個橙份量>，橙皮<半個(記住唔好刨到白色部份)>，生薏米<半斤>，冰糖，水<適量>
做法 :
1. 生薏米洗淨，煲內放入適量水，凍水落生薏米
2. 待滾後轉慢火煲1小時熄火，加入橙皮蓋上蓋焗20分鐘
3. 隔去橙皮及薏米後，加入鮮橙汁及冰糖拌勻，待冰糖溶掉後放涼，放入雪櫃冷藏即可
感謝 袁太廚房 提供以上資料
個人日誌: http://elanie-kitchen.blogspot.hk/
